ޖަޕާނާއެކު އޮތް އިޤްތިޞާދީ ގުޅުން އިތުރަށް ބަދަހިކުރުމަށް ރާއްޖެއިން އިސްކަންދޭ: މިނިސްޓަރު އިރުތިޝާމް

ދިވެހިރާއްޖެއާއި ޖަޕާނާ ދެމެދު އޮތް އިޤްތިޞާދީ ގުޅުންތައް އިތުރަށް ވަރުގަދަކޮށް، ޖަޕާނުގެ އިންވެސްޓްމަންޓްތައް ރާއްޖޭގައި އިތުރުކުރުމަށް ސަރުކާރުން ބޭނުންވާކަމަށް މިނިސްޓަރ އޮފް ފޮރިން އެފެއާޒް އިރުތިޝާމް އާދަމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ޖަޕާނުގެ އެމްބަސީން އިންތިޒާމުކޮށްގެން ބޭއްވި ޚާއްޞަ ބިޒްނަސް ވެބިނާ އެއްގައި ވާހަކަފުޅު ދައްކަވަމުންނެވެ. މި ވެބިނާގައި ވާހަކަފުޅު ދައްކަވަމުން މިނިސްޓަރު ވިދާޅުވީ ރާއްޖެއާއި ޖަޕާނަކީ އިތުބާރާއި، އިޙްތިރާމާއި، އެއްބާރުލުމުގެ މައްޗަށް ބިނާވެފައިވާ ގާތް ރަޙުމަތްތެރިކަމެއް އޮތް ދެ ޤައުމު ކަމަށެވެ. އަދި އުމްރާނީ ތަރައްޤީ، މަސްވެރިކަން، ތިމާވެށި ހިމާޔަތްކުރުން، ކާރިސާތަކުން ރައްކާތެރިވުން އަދި އިންސާނީ ވަސީލަތްތައް ތަރައްޤީކުރުން ފަދަ ދާއިރާތަކުން ދެ ޤައުމުގެ ގުޅުން އަހަރުތަކެއް ވަންދެން ވަރުގަދަކޮށް ދެމެހެއްޓިފައިވާކަން އެކަމަނާ ފާހަގަކުރެއްވިއެވެ.

މިނިސްޓަރު އިރުތިޝާމް ވިދާޅުވި ގޮތުގައި، ދުނިޔޭގެ އިންވެސްޓްމަންޓް މާހައުލު ބަދަލުވަމުންދާއިރު، ވިޔަފާރިތަކުން ބަލަނީ އިތުބާރު ހުރި ބައިވެރިންނަށާއި ދެމެހެއްޓެނިވި ފުރުޞަތުތައް އޮތް މާކެޓްތަކަށެވެ. އެގޮތުން ރާއްޖެއަކީ އެފަދަ މަންޒިލަކަށް ހެދުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް އެކަމަނާ ވިދާޅުވިއެވެ. ރާއްޖެއަކީ ދުނިޔޭގެ ފެންވަރުގައި ފާހަގަކޮށްލެވޭ ފަތުރުވެރިކަމުގެ މަންޒިލަކަށް ވީނަމަވެސް، މިހާރު ފަތުރުވެރިކަމުގެ ދާއިރާގެ ބޭރުންވެސް ރާއްޖޭގައި އިންވެސްޓްކުރުމުގެ ބޮޑެތި ފުރުޞަތުތަކެއް އެބަހުރިކަން މިނިސްޓަރު ފާހަގަކުރެއްވިއެވެ.

އިޤްތިޞާދު ސިންދަފާތު ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މުހިންމު ސިޔާސަތެއްކަން ފާހަގަކުރައްވައި، އިންވެސްޓްމަންޓް މާހައުލު ހަރުދަނާކުރުމަށާއި، ޤަވާޢިދުތައް ޒަމާނީކޮށް ވިޔަފާރިތަކަށް ފަހި މާހައުލެއް ޤާއިމުކުރުމަށް އިޞްލާޙީ ބަދަލުތަކެއް ގެންނަމުންދާ ކަމަށްވެސް މިނިސްޓަރު ވިދާޅުވިއެވެ.

ޖަޕާނަކީ ދުނިޔޭގެ އެންމެ ކުރިއަރާފައިވާ އެއް އިޤްތިޞާދުކަން ފާހަގަކުރައްވައި، ޖަޕާނުގެ ކުންފުނިތަކުގެ އާ އީޖާދުތަކާއި ޓެކްނޮލޮޖީގެ ބޭނުން ހިފުމުގެ މުހިންމުކަން މިނިސްޓަރު ފާހަގަކުރެއްވިއެވެ. އަދި ޖަޕާނުގެ އިންވެސްޓްމަންޓްތައް ރާއްޖެއަށް ގެނައުމަށް މަގުފަހިކޮށް، ދެ ޤައުމަށްވެސް ފައިދާވާނެ ފަދަ ޕާޓްނަޝިޕްތައް އުފެއްދުމަށް މަސައްކަތް ކުރަންޖެހޭ ކަމަށް އެކަމަނާ ވިދާޅުވިއެވެ.

މި ވެބިނާގައި ރާއްޖެއިން އިސްކަންދޭ މުހިންމު ދާއިރާތަކުން ހުރި އިންވެސްޓްމަންޓް ފުރުޞަތުތަކާ ގުޅޭގޮތުން މަޢުލޫމާތު ދީފައިވެއެވެ. އޭގެ ތެރޭގައި ބަންކަރިންގް، ކަނޑުގެ ދަތުރުފަތުރުގެ ޚިދުމަތްތައް، އިއާދަކުރަނިވި ހަކަތަ، މާލީ ޚިދުމަތްތައް، ސިނާޢީ ތަރައްޤީ، ސްޕެޝަލް އިކޮނޮމިކް ޒޯން (SEZ)، ޑިޖިޓަލް ވިޔަފާރި، އީ-ކޮމާސް އަދި ކްރިއޭޓިވް އިކޮނޮމީ ހިމެނެއެވެ.

މީގެ އިތުރުން، ރާއްޖޭގެ އިންވެސްޓްމަންޓް މާހައުލާއި، ބޭރުގެ އިންވެސްޓަރުންނަށް އެހީތެރިވުމަށް ސަރުކާރުން އެކުލަވާލާފައިވާ ސިޔާސަތުތަކާ ގުޅޭ ތަފްޞީލީ މަޢުލޫމާތުވެސް މި ބައްދަލުވުމުގެ ބައިވެރިންނަށް ވަނީ އަރުވާފައެވެ.