ގަވާއިދާ ޚިލާފަށް ބޭރު ފައިސާ ބޭރުކުރަން އުޅުނު ބަންގްލަދޭޝްގެ 6 މީހަކު ގިނަ އަދަދެއްގެ ފައިސާއާއެކު އަތުލައިގެންފި

ގަވާއިދާ ޚިލާފަށް ބޭރު ފައިސާ ގަނެވިއްކުމުގެ މުއާމަލާތްތައް ހިންގާ ފަރާތްތައް ހޯދައި، ޤާނޫނީ ފިޔަވަޅު އެޅުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، 3.8 މިލިއަނަށް ވުރެ ގިނަ ރުފިޔާގެ ބޭރު ފައިސާއާއެކު ބަންގްލަދޭޝްގެ ހަ މީހަކު ވެލާނާ އިންޓަރނޭޝަނަލް އެއާޕޯޓުން ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން ބުނީ، މި މީހުން ހިފަހައްޓާފައިވަނީ ގަވާއިދާ ޚިލާފަށް ފައިސާ ބޭރުކުރާ މައްސަލަތައް ހުއްޓުވުމަށް އެކުލަވާލާފައިވާ ޚާއްސަ ޓާސްކްފޯހަށް ލިބުނު މައުލޫމާތަކާ ގުޅިގެން 2026 ސެޕްޓެންބަރު 18 ވަނަ ދުވަހު ހިންގި ޚާއްސަ އޮޕަރޭޝަނެއްގައެވެ. މި ހަ މީހުންނަކީ ވެލާނާ އިންޓަރނޭޝަނަލް އެއާޕޯޓުން ބަންގްލަދޭޝަށް ފުރަން ގޮސް ތިބި ބައެކެވެ.

ފުލުހުންގެ ބެލުމުގެ ދަށަށް ގެނައި ފައިސާގެ ތެރޭގައި 18 ޤައުމެއްގެ ފައިސާ ހިމެނެއެވެ. އޭގެ ތެރޭގައި:

174,161 ޔޫ.އެސް ޑޮލަރު

56,760 ޔޫރޯ

1,815 ސްޓަރލިންގ ޕައުންޑް ހިމެނެއެވެ.

މި ފައިސާތަކުގެ ޖުމުލަ އަގު ގާތްގަނޑަކަށް 3,861,415.29 (ތިން މިލިއަން އަށްލައްކަ ފަސްދޮޅަސް އެއްހާސް ހަތަރުސަތޭކަ ފަނަރަ ރުފިޔާ އޮނަތިރީސް ލާރި) އަށް އަރާ ކަމަށް ފުލުހުން މައުލޫމާތު ދެއެވެ.

މި މައްސަލައާ ގުޅިގެން ތަހުގީގުގެ ބޭނުމަށް އެ ފައިސާތައް ފުލުހުންގެ ބެލުމުގެ ދަށަށް ގެނެސްފައިވާއިރު، ފުރުމަށް އެއާޕޯޓަށް ގޮސް ތިބި ބަންގްލަދޭޝްގެ 6 މީހުން ވެސް މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

މި މައްސަލަ ދިވެހި ފުލުހުންގެ ޚިދުމަތުން އިތުރަށް ތަހުގީގު ކުރަމުންދާއިރު، ރާއްޖެއިން ބޭރަށް ޤަވާޢިދާ ޚިލާފަށް ބޭރު ފައިސާ ފޮނުވުމާއި، ކަޅު ބާޒާރުގައި ޑޮލަރުގެ މުއާމަލާތްކުރާ ފަރާތްތަކާ ދެކޮޅަށް ފިޔަވަޅު އެޅުމުގެ މަސައްކަތް ކަމާބެހޭ އިދާރާތައް ގުޅިގެން މިހާރު ދަނީ ވަރަށް ބާރަށް ކުރަމުންނެވެ.