ނުފެންނަ އަދި ނުކުޅެދުންތެރިކަން ހުންނަ ފަރާތްތަކަށް ޚާއްސަކޮށް ވީއައިއޭގައި 'ބޮލި ކާމް ރޫމް' ހުޅުވައިފި

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި، ނުފެންނަ ނުކުޅެދުންތެރިކަން ހުންނަ ފަރާތްތަކަށް ޚާއްސަ 'ސެންސަރީ ފްރެންޑްލީ' ފެސިލިޓީއެއް ހުޅުވައިފިއެވެ. މިއީ އެއާޕޯޓުން ޚިދުމަތް ހޯދާ ހުރިހާ ފަރާތްތަކަކަށް ޝާމިލު އަދި ފަސޭހަ މާހައުލެއް ގާއިމުކުރުމަށް އެ ކުންފުނިން ކުރަމުންދާ މަސައްކަތުގެ ދަށުން އެޅުނު މުހިންމު ފިޔަވަޅެކެވެ.

'ބޮލި ކާމް ރޫމް' ގެ ނަމުން ނަންދެވިފައިވާ މި ފެސިލިޓީ ރަސްމީކޮށް ހުޅުއްވައިދެއްވީ އެމްއޭސީއެލްގެ މެނޭޖިން ޑިރެކްޓަރު އަދި ސީއީއޯ އިބްރާހީމް ޝަރީފް މުހައްމަދެވެ.

އެމްއޭސީއެލް އިން މަޢުލޫމާތު ދޭ ގޮތުގައި، މި ކޮޓަރި ފަރުމާކޮށްފައިވަނީ ނުފެންނަ ނުކުޅެދުންތެރިކަން ހުންނަ ފަރާތްތަކަށާއި ޚާއްސަ އެހީއަށް ބޭނުންވާ ދަތުރުވެރިންނަށް އަމާޒުކޮށްގެންނެވެ. މިއީ ދަތުރުގެ ކުރިން އިހުސާސްވާ ހާސްކަމާއި ނުތަނަވަސްކަން ކުޑަކޮށްދީ، ހިމޭން އަދި އަރާމު މާހައުލެއްގައި ވަގުތު ހޭދަކޮށްލުމުގެ ފުރުސަތު ފަހިކޮށްދޭނެ ތަނެކެވެ.

މިކަމާ ގުޅޭގޮތުން އެމްއޭސީއެލް އިން ބުނީ، މި އިސްނެގުމަކީ ކޮންމެ ދަތުރުވެރިއަކަށްވެސް "އަޅާލުމާއި، އިހުތިރާމާއި އަދި ގަދަރާއެކު" ދަތުރުކުރުމުގެ ފުރުސަތު ކަށަވަރުކޮށްދިނުމަށް އެ ކުންފުނިން ގެންގުޅޭ ސިޔާސަތު ރަމްޒުކޮށްދޭ ކަމެއް ކަމަށެވެ.

މި ފެސިލިޓީ ހުޅުވުމަކީ އޯޓިޒަމް ސްޕެކްޓްރަމް ޑިސްއޯޑަރ، ސެންސަރީ ސެންސިޓިވިޓީ އަދި ނުފެންނަ އެހެނިހެން ނުކުޅެދުންތެރިކަން ހުންނަ ފަރާތްތަކަށް އެއާޕޯޓުތަކާއި އާންމު ދަތުރުފަތުރުގެ ނިޒާމުގެ ތެރެއިން ލުއިފަސޭހަކަން ހޯދައިދިނުމަށް ބައިނަލްއަގުވާމީ ފެންވަރުގައި ކުރަމުންދާ މަސައްކަތްތަކާ އެއްގޮތްވާ ގޮތުގެ މަތިން ކުރެވުނު ކަމެކެވެ.

ރާއްޖޭގެ މައި ދޮރާށި ކަމަށްވާ ވެލާނާ އިންޓަނޭޝަނަލް އެއާޕޯޓަކީ އަހަރަކު އެތައް މިލިއަން ފަސިންޖަރުންނެއް ޚިދުމަތް ހޯދާ ތަނެކެވެ. އެއާޕޯޓް ޒަމާނީކުރުމަށް ކުރިއަށްގެންދާ މަޝްރޫއުތަކުގެ ތެރެއިން، ފަސިންޖަރުންގެ ތަޖުރިބާ ރަނގަޅުކުރުމަށް ގިނަ ފިޔަވަޅުތަކެއް ދަނީ އަޅަމުންނެވެ. މިގޮތުން 'ބޮލި ކާމް ރޫމް' އިތުރުވުމަކީ، އެއާޕޯޓުގެ ބާރުބޮޑު މާހައުލުގެ ސަބަބުން ދަތިތަކާ ކުރިމަތިލާންޖެހޭ ފަރާތްތަކަށް ލިބިގެންދާނެ ބޮޑު ލުޔެކެވެ.

ދުނިޔޭގެ ބޮޑެތި އެއާޕޯޓުތަކުގައިވެސް މިފަދަ 'ސެންސަރީ ރޫމް' ތައް ގާއިމުކުރަމުންދާއިރު، މި ފެސިލިޓީއާއެކު ވީއައިއޭ ވެގެން ގޮސްފައިވަނީ ބައިނަލްއަގުވާމީ މިންގަނޑުތަކަށް ފެތޭ، ޝާމިލު ޚިދުމަތްތަކެއް ފޯރުކޮށްދޭ އެއާޕޯޓަކަށެވެ. މިހާރު މި ފެސިލިޓީގެ ޚިދުމަތް ޝަރުތު ހަމަވާ ދަތުރުވެރިންނަށް ލިބޭނެ ކަމަށް އެމްއޭސީއެލް އިން ބުނެއެވެ.