މާލެ ކައިރީގައި ދެ ލޯންޗު ޖެހި ނުރައްކާތެރި އެކްސިޑެންޓެއް ހިނގައި، ދެ މީހަކަށް އަނިޔާވެއްޖެ
މާލޭގެ އިއްޒުއްދީން ފާލަން ކައިރިން ދެ ލޯންޗެއް ޖެހި މިއަދު ނުރައްކާތެރި އެކްސިޑެންޓެއް ހިނގައިފިއެވެ. މި ހާދިސާގައި އަނިޔާވި ދެ މީހަކަށް މިހާރު ދަނީ އައިޖީއެމްއެޗްގައި ފަރުވާ ދެމުންނެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދެއްވި ގޮތުގައި، މި އެކްސިޑެންޓް ހިނގާފައިވަނީ އިއްޒުއްދީން ފާލަން ކައިރިން ފަޅަށް ވަންނަ ނެރުމައްޗާ ދިމާލުންނެވެ. މި ހާދިސާގައި ހިމެނޭ އެއް ލޯންޗަކީ "ޓުއަރ ގާޑް" ނަމަކަށް ކިޔާ ލޯންޗެކެވެ. އެމްއެންޑީއެފް އިން މައުލޫމާތު ދެއްވި ގޮތުގައި، މި ހާދިސާ ހިނގި ވަގުތު އެ ލޯންޗުގައި ތިބީ ދެ ފަޅުވެރިންނެވެ. މި އެކްސިޑެންޓުގައި އެ ދެ މީހުންނަށް ވެސް ބޮޑެތި އަނިޔާތަކެއް ލިބިފައިވާތީ، މިހާރު ދަނީ އައިޖީއެމްއެޗް ހޮސްޕިޓަލުގައި ފަރުވާ ދެމުންނެވެ.
މި ހާދިސާއާ ގުޅިގެން އެމްއެންޑީއެފް އިން ދަނީ އަނިޔާވި މީހުންނަށާއި، އެކްސިޑެންޓްވި "ޓުއަރ ގާޑް" ލޯންޗަށް އެހީތެރިކަން ފޯރުކޮށްދެމުންނެވެ.
މި އެކްސިޑެންޓުގައި އެއް ލޯންޗަށް ވަނީ ވަރަށް ބޮޑަށް ގެއްލުންވެފައެވެ. އެގޮތުން އެ ލޯންޗުގެ ކުރީކޮޅު އޮތީ އެއްކޮށް ފުނޑުފުނޑުވެ، ބޮޑެތި ގެއްލުންތަކެއް ލިބިފައެވެ. ކަމާބެހޭ އިދާރާތަކުން މިހާރު ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
