މާލޭގެ ޕޯސްޓް އޮފީސް ސަރަހައްދު ޖެޓީ ފެރީތަކަށް ވަގުތީގޮތުން ހުޅުވާލައިފި

މާލޭގެ ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ މަސައްކަތް ކުރިއަށްދާތީ، ދަތުރުވެރިންނަށް ލުއިފަސޭހަކޮށްދިނުމުގެ ގޮތުން ޕޯސްޓް އޮފީހާއި ބާސެލޮސް ރެސްޓޯރެންޓާ ދެމެދުގައިވާ ޖެޓީ ސަރަހައްދަށް ފެރީ ކައިރިކުރުމުގެ ހުއްދަ އެމްޓީސީސީން ވަގުތީގޮތުން ދީފިއެވެ.

އެމްޓީސީސީން މިއަދު ނެރުނު އިޢުލާނެއްގައި ބުނެފައިވަނީ، މި ސަރަހައްދަށް ފެރީ ކައިރިކުރުމާއި ފަސިންޖަރުން އަރުވާ ބޭލުމުގެ އިންތިޒާމު މިހާރު ހަމަޖެހިފައިވާ ކަމަށެވެ. މި ބަދަލާ ގުޅިގެން ފެރީ އޮޕަރޭޓްކުރުމަށް ކަނޑައެޅިފައިވާ ސަރަހައްދު ސާފުކޮށް އެނގޭނެ ފަދަ ޗާޓެއްވެސް އެ ކުންފުނިން ވަނީ އާންމުކޮށްފައެވެ.

ނަމަވެސް، އެ ސަރަހައްދުގެ ޖެޓީ ބޭނުންކުރުމުގެ ހުއްދަ ދިން ނަމަވެސް، ބޮޑުތަކުރުފާނު މަގު ހެދުމުގެ މަސައްކަތް ހުއްޓުމެއް ނެތި ކުރިއަށްދާތީ އެ މަގު އަދިވެސް އޮންނާނީ އާންމު ދަތުރުފަތުރަށް ބަންދުކޮށްފައެވެ. އެހެންކަމުން، އެއްވެސް ބާވަތެއްގެ ދުއްވާ އެއްޗަކަށް އެ މަގުގައި ހަރަކާތްތެރި ނުވެވޭނެ ކަމަށް އެމްޓީސީސީން މައުލޫމާތުދެއެވެ.

ފެރީގެ ޚިދުމަތް ހޯއްދަވާ ފަރާތްތަކުން އެ ސަރަހައްދު ބޭނުންކުރައްވާއިރު، އެމްޓީސީސީގެ މުވައްޒަފުން ދޭ އިރުޝާދުތަކާ އެއްގޮތަށް އަމަލުކުރުމަށް އެ ކުންފުނިން އިލްތިމާސްކުރެއެވެ. މިކަމާ ގުޅޭ އިތުރު މައުލޫމާތު ހޯއްދެވުމަށް އެމްޓީސީސީގެ ހޮޓްލައިން ނަންބަރު 1650 އަށް ގުޅުއްވުމަށް އެ ކުންފުނިން އެދެއެވެ.