ސަރުކާރުން މިފަހަރު ހުޅުވާލާފައިވާ ހައުސިން ސްކީމަކީ ދެފުއްފެންނަ، އިންސާފުވެރި ސްކީމަކަށްވާނެކަމުގެ ޔަގީންކަން އެބައޮތް: ރައީސް

ސަރުކާރުން މިހާރު ތަޢާރަފުކޮށްފައިވާ ބޯހިޔާވަހިކަމުގެ މަޝްރޫޢަކީ އިންސާފުވެރި އަދި ދެފުށް ފެންނަ ގޮތަށް ކުރިއަށްދާނެ މަޝްރޫޢެއް ކަމުގެ ފުރިހަމަ ޔަގީންކަން އެބައޮތް ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.

ރައްޔިތުންގެ ބައްދަލުވުމުގެ މި ހަފުތާ ތެރޭގައި ރައީސުލްޖުމްހޫރިއްޔާއާ ބައްދަލުކުރި ގިނަ އާންމުންގެ މައިގަނޑު ކަންބޮޑުވުމަކަށް ވެފައިވަނީ ގެދޮރުވެރިކަމުގެ ދަތިތަކެވެ. މިގޮތުން އެ ފަރާތްތަކުގެ ދިރިއުޅުމުގެ ހާލަތު ހުރިގޮތުންނާއި މީގެ ކުރިން ހިންގި މަޝްރޫޢުތަކުން ބޯހިޔާވަހިކަން ލިބޭގޮތް ނުވުމުގެ ކަންބޮޑުވުންތައް ވަނީ އެމަނިކުފާނާ ހިއްސާކޮށްފައެވެ. މި ޝަކުވާތަކަށް ޖަވާބުދެއްވަމުން ރައީސް ވިދާޅުވީ، ޕޮއިންޓް ދިނުމުގެ އެންމެހައި ކަންކަން ކުރިއަށް ގެންދަނީ އެންމެ އެކަށޭނަ، ހައްގުވެރި ފަރާތްތަކަށް ފުރުސަތު ކަށަވަރުވާނޭ ފަދަ އުސޫލަކުން ކަމަށެވެ.

ހުޅުމާލޭގެ އައު ސަރަހައްދުތަކުގެ އަސާސީ ހިދުމަތްތައް

މީގެއިތުރުން، 'ރައްޔިތުންގެ އަޑު' ޕްރޮގްރާމުގައި ވާހަކަދެއްކި ފަރާތަކުން ވަނީ ހުޅުމާލޭގެ އަލަށް ހިއްކި ސަރަހައްދުތަކުން ދޫކޮށްފައިވާ ގޯތިތަކުގައި ފެނާއި ނަރުދަމާ އަދި މަގު ހެދުމުގެ މަސައްކަތްތައް ނުނިމި ހުރުމުގެ ސަބަބުން، ގެދޮރު އިމާރާތްކުރުމުގެ ހުއްދަ ނުލިބޭ މައްސަލަ ފާހަގަކޮށްފައެވެ. މިކަމާ ގުޅިގެން ރައީސް ވިދާޅުވީ، ހުޅުމާލޭގެ އައު ސަރަހައްދުތަކުގައި ގެދޮރު ބިނާކުރުމަށް ރައްޔިތުން ބޭނުންވެފައިވާއިރު، އެކަމަށް ކޮންމެހެން ބޭނުންވާ އަސާސީ ހިދުމަތްތައް ގާއިމުކުރުމުގެ މަސައްކަތްތައް ކުރެވެމުންދާ ކަމަށެވެ.

މި މައްސަލައަށް ހައްލެއް ހޯދައިދިނުމަށް އެޗްޑީސީން އެކި މަރުހަލާތަކަށް ބަހާލައިގެން މަސައްކަތް ކުރަމުން އަންނަކަން ރައީސް ފާހަގަކުރެއްވިއެވެ. އަދި އެ މަސައްކަތްތައް ވީހާވެސް އަވަހަކަށް ނިންމޭނެ މަގުތައް ހޯދައިދެއްވާނެ ކަމުގެ ޔަގީންކަންވެސް އެމަނިކުފާނު ވަނީ ދެއްވާފައެވެ.

އިކުއިޓީ ފައިސާ ދެއްކުމަށް ލުއި ގޮތްތަކެއް

ގެދޮރު އެޅުމަށް މާލީ ތަނަވަސްކަން ނެތް ފަރާތްތަކަށް ސަރުކާރު މެދުވެރިވެގެން އެހީތެރިކަން ފޯރުކޮށްދިނުމަށް ރޭވިފައިވާ ޕްރޮގްރާމްތަކުގެ މައްޗަށްވެސް ރައީސް އަލިއަޅުއްވާލެއްވިއެވެ. މިގޮތުން ބޭންކުތަކަށް ދައްކަންޖެހޭ އިކުއިޓީ ފައިސާ ދެއްކުމުގައި ކުރިމަތިވާ ގޮންޖެހުންތައް ހައްލުކުރުމަށް ސަރުކާރުން މަސައްކަތް ކުރަމުންދާ ކަމުގައި ވިދާޅުވިއެވެ.

ރައީސް އިތުރަށް ވިދާޅުވީ، އިކުއިޓީ ފައިސާ ދެއްކުމުގައި ލުއިފަސޭހަކޮށްދިނުމަށް ނިޒާމެއް އެކުލަވާލުމުގެ މަސައްކަތް ކުރެވެމުންދާ ކަމަށާއި، މިއީ ގިނަ ރައްޔިތުން އެދޭ އެންމެ މުހިންމު ކަންތައް ކަމަށެވެ. އަދި މިކަމަށް ގިނަ ފައިސާއާއި އެކަށީގެންވާ ވަގުތު ބޭނުންވާކަންވެސް އެމަނިކުފާނު ފާހަގަކުރެއްވިއެވެ.