ގަދަ ވަޔާއެކު އައްޑޫ ސިޓީގެ ދެ ގެއެއްގެ ފުރާޅު އެއްލާލައިފި
ހުޅަނގު މޫސުމުގެ ގަދަ ވިއްސާރައާއި ވަޔާއެކު އައްޑޫ ސިޓީގެ ދެ ގެއެއްގެ ފުރާޅު އެއްލާލައި، ބޮޑެތި ގެއްލުންތަކެއް ވެއްޖެއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކުރި ގޮތުގައި، މި ހާދިސާ ހިނގާފައިވަނީ އާދިއްތަ ދުވަހުއެވެ. މިގޮތުން އައްޑޫ ސިޓީ ހިތަދޫގެ ދެ ގެއެއް ކަމަށްވާ "ހުޅުދޫއާގެ" އާއި "އޯކަމްލީވާ" ގެ ފުރާޅަށް ލިބުނު ގެއްލުންތަކާ ގުޅިގެން، ސިފައިން ވަނީ އެ ސަރަހައްދުގައި ހަރަކާތްތެރިވެ، މަރާމާތުގެ މަސައްކަތުގައި އެހީތެރިކަން ފޯރުކޮށްދީފައެވެ.
މިކަމާ ގުޅިގެން އައްޑޫ ސިޓީގެ މޭޔަރު އަލީ ނިޒާރު ވިދާޅުވީ، މި ހާދިސާ ހިނގާފައިވަނީ ރޭގަނޑު ކުރި ބޯ ވިއްސާރައިގެ ތެރޭގައި ކަމަށެވެ.
ވިއްސާރައިގެ ސަބަބުން ދެކުނުގެ ބައެއް ރަށްރަށުގައި ފެންބޮޑުވުމުގެ މައްސަލަތައް ވެސް ވަނީ ކުރިމަތިވެފައެވެ. އެގޮތުން އައްޑޫ ސިޓީ ފޭދޫގެ އިތުރުން ގދ. މަޑަވެލީގައި ފެންބޮޑުވުމާ ގުޅިގެން، އެމްއެންޑީއެފްގެ ސިފައިން ވަނީ އެ ރަށްރަށުގެ މަގުތަކުން ފެން ހިއްކުމުގެ މަސައްކަތުގައި އެހީތެރިވެފައެވެ.
މުޅި ރާއްޖެއަށް މިހާރު ކުރަމުންދާ މި ވިއްސާރައަކީ ހުޅަނގު މޫސުން ފެށި، މޫސުން ގޯސްވުމުގެ ސަބަބުން ކުރަމުންދާ ވިއްސާރައެކެވެ. މޫސުން ގޯސްވެ، ގަދަވަޔާއެކު ބޯކޮށް ވާރޭވެހޭނެ ކަމަށް ލަފާކުރެވޭތީ، މޫސުމަށް ސަމާލުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
