މާރަންދޫ ކައުންސިލްގެ ކަންބޮޑުވުންތައް ޙައްލުކޮށްދިނުމަށް މަސައްކަތްކުރައްވާނެ ކަމަށް މިނިސްޓަރ ވިދާޅުވެއްޖެ
ހއ. މާރަންދޫ ކައުންސިލަށް ދިމާވެފައިވާ ބައެއް މައްސަލަތަކާއި ގުޅޭ ގޮތުން މާރަންދޫ ކައުންސިލްގެ ފަރާތުން ސިޓީތަކާއި އިދާރީ ދާއިރާތައް ހިންގެވުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރާ ބައްދަލު ކުރައްވައިފިއެވެ.
މި ބައްދަލުކުރެއްވުމުގައި މާރަންދޫ ކައުންސިލަށް އެންމެ ބޮޑަށް ދިމާވެފައިވާ ކައުންސިލްގެ ޖާގައިގެ ދަތިކަމުގެ މައްސަލާގެ އިތުރަށް މާރަންދޫ ބަނދަރު ތިލަވާ މައްސަލާގައި ހުރި ކަންބޮޑުވުން މާރަންދޫ ކައުންސިލްގެ ރައީސް ޖައިލަމް ހާރޫން ވަނީ މިނިސްޓަރ އާދަމް ޝަރީފާ ހިއްސާ ކުރައްވާފައެވެ.
ޚާއްޞަކޮށް މާރަންދޫ ކައުންސިލްގެ އާޢިމާރާތް ބަޖެޓްގައި ހިމެނި އެ މަސައްކަތް ނުފެށި އެތައް ދުވަހެއް ދިގުލައިގެން ދިއުމުގެ މައްސަލައަށް، ނިމުން ގެނައުމަށް ސަރުކާރުގެ ތެރެއިން މަސައްކަތްކޮށްދެއްވާނެ ކަމުގެ ޔަޤީންކަން ވަޒީރު ދެއްވެވިއެވެ.
މީގެ އިތުރުން ބަނދަރު ތިލަވަމުން އަންނަ މައްސަލަ އިތުރަށް ބައްލަވައި، އެ ކަން ކުރެވޭނެ ގޮތެއް ހޯދުމަށް މަގުފަހިކުރުމަށް މަސައްކަތްޕުޅުކޮށްދެއްވާނެ ކަމަށް ވަޒީރުވަނީ ވިދާޅުވެފައެވެ. މި ބައްދަލުވުމުގައި ވަޒީރުގެ އިތުރުން ހއ. ހިމެނޭ ކުލަސްޓަރ ހިންގެވުމާއި ޙަވާލުވެ ހުންނެވި މި މިނިސްޓްރީގެ ސްޓޭޓް މިނިސްޓަރ މުޙައްމަދު މާހިރުގެ އިތުރުން އެ ކުލަސްޓަރގައި ހިމެނިލައްވައި އެންމެހައި އަތޮޅު ކޯޑިނޭޓަރުން ބައިވެރިވެލެއްވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
