ސޯދިގަކީ އައްޑޫގެ ގޮނޑިއަށް ކަމުދާ ކެނޑިޑޭޓެއް ނޫން: މިނިސްޓަރ ޝިޔާމް

އައްޑޫ ސިޓީގެ ކުރީގެ މޭޔަރ އަބްދުﷲ ސާދިގު (ސޯބެ) އަކީ އައްޑޫގެ ތަރައްގީއަށް އިހުމާލުވެފައިވާ ބޭފުޅެއް ކަމަށާއި، އޭނާއަކީ އައްޑޫގެ ގޮނޑިއަށް ކަމުދާ ކެނޑިޑޭޓެއް ނޫން ކަމަށް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމް ވިދާޅުވެއްޖެއެވެ.

މިނިސްޓަރު ޝިޔާމް މިހެން ވިދާޅުވީ، ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީގެ ފަރާތުން ވާދަކުރައްވާ ކެނޑިޑޭޓް އަހްމަދު ސައީދުގެ ކެމްޕެއިން ލޯންޗުކުރުމަށް ރޭ އައްޑޫގައި ބޭއްވި ޖަލްސާގައި ވާހަކަ ދައްކަވަމުންނެވެ.

ޝިޔާމް ވިދާޅުވީ 2008 ވަނަ އަހަރު ވެރިކަން ހިންގާ ގޮތަށް ބަދަލު އައިސް، އަތޮޅުތައް ތަމްސީލުކުރުމަށް ރައްޔިތުން އެންމެ ބޮޑަށް ބޭނުންވި ދުވަސްވަރުން ފެށިގެން، 2011 ވަނަ އަހަރު ލާމަރުކަޒީ ގާނޫނުގެ ދަށުން އައްޑޫގެ ފުރަތަމަ މޭޔަރުގެ ގޮތުގައި ސާދިގު ހޮއްވެވި ކަމަށެވެ. އަދި 2021 ވަނަ އަހަރާ ހަމައަށް 10 އަހަރަށް ވުރެ ގިނަ ދުވަހު އައްޑޫގެ އެންމެ މަތީ މަގާމުގައި ހުންނެވުމުގެ ފުރުސަތު އޭނާއަށް ލިބުނުކަން ޝިޔާމް ފާހަގަކުރެއްވިއެވެ.

ނަމަވެސް، އެމްޑީޕީގެ ދެ ސަރުކާރެއްގައި އައްޑޫގެ މެޖޯރިޓީއާއެކު އޮތްއިރުވެސް، އައްޑޫގެ އުމްރާނީ، އިޖްތިމާއީ އަދި އިގުތިޞާދީ ތަރައްޤީއަށް ވަރަށް ބޮޑަށް އިހުމާލުވެފައިވާ ކަމަށް ޝިޔާމް ތުހުމަތު ކުރެއްވިއެވެ.

"މީގެ ފުރިހަމަ ޒިންމާ ނަގަން ޖެހެނީ އަބްދުﷲ ސާދިގު. މި ސިޓީގެ ބަސް ބުނުމުގެ އެންމެ މަތީ މަގާމުގައި ހުރެގެން ސިޔާސީ ބޭނުމެއްގައި ނުކުމެ ހުރީ، އެއްވެސް ކަމެއް ކޮށްދޭކަށް ނޫން،" މިނިސްޓަރު ވިދާޅުވިއެވެ.

ޝިޔާމް އިތުރަށް ވިދާޅުވީ، އެމްޑީޕީން ވެސް ސާދިގަށް "ނޫން" ބުނެފައިވާ ކަމަށެވެ. އެގޮތުން ޖެހިގެން އައި ދައުރުގައި ޕްރައިމަރީ އިންތިހާބުގައި އޭނާ ކުރިމަތިލެއްވި ނަމަވެސް، އެމްޑީޕީގެ މެމްބަރުން އޭނާ ނުހޮވީ އައު ކެނޑިޑޭޓަކާއި ބަދަލަކަށް ބޭނުންވެފައި ތިބުމުން ކަމަށް ޝިޔާމް ވިދާޅުވިއެވެ.

"ގޭގެއަށް ދިޔުމުން އެނގުނީ މި ދާއިރާގެ ތަރައްގީއަށް ރައްޔިތުން ބޭނުންވެފައިވާ މިންވަރު،" ރައްޔިތުންގެ އިހުސާސްތައް ހިއްސާކުރައްވަމުން ޝިޔާމް ވިދާޅުވިއެވެ.

މި ޖަލްސާގައި ޝިޔާމް ވަނީ ރައީސް ޑރ. މުހައްމަދު މުއިއްޒުގެ ސަރުކާރުން އައްޑޫގެ ތަރައްގީއަށް ގެންގުޅުއްވާ ތަސައްވުރަށް އަލިއަޅުއްވާލައްވައި، ސަރުކާރުގެ ކެނޑިޑޭޓަށް ތާއީދު ކޮށްދިނުމަށް އައްޑޫގެ ރައްޔިތުންގެ ކިބައިން އެދިވަޑައިގެންފައެވެ.