ފެނަކައިން ދެ ރަށަކަށް އައު ޖެންސެޓްތަކެއް ފޮނުވައިފި

ފެނަކަ ކޯޕަރޭޝަނުން ރަށްރަށުގައި ފޯރުކޮށްދޭ ކަރަންޓުގެ ޚިދުމަތް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރަމުންދާ މަސައްކަތުގެ ދަށުން ފ. މަގޫދޫ އަދި ރ. އިންނަމާދޫއަށް މުޅިން އައު ދެ ޖެނެރޭޓަރު ފޮނުވައިފިއެވެ.

މީޑިއާ ބްރީފެއްގައި ފެނަކައިން ހާމަކޮށްފައިވާ ގޮތުގައި، މި ދެ ރަށަށްވެސް ފޮނުވާފައިވަނީ 400 ކިލޯވޯޓުގެ ދެ ޖެންސެޓެވެ. މި ޖެންސެޓްތައް އިއްޔެގެ ވަގުތެއްގައި އެ ރަށްރަށަށް ގެންގޮސްފައިވާއިރު، މިހާރު ދަނީ ޖެންސެޓްތައް އިންސްޓޯލް ކުރުމުގެ މަސައްކަތް ބާރުސްޕީޑުގައި ކުރަމުންނެވެ. ފެނަކައިން ބުނީ އެ ކުންފުނީގެ އަމާޒަކީ މިއަދުގެ ނިޔަލަށް އިންސްޓޯލްކޮށް ނިންމައި، އައު ޖެންސެޓްތަކުން ޚިދުމަތް ދޭން ފެށުންކަމަށެވެ.

ފ. މަގޫދޫގައި މިހާރު ކަރަންޓުގެ ޚިދުމަތް ދެމުންދަނީ 400 ކިލޯވޯޓުގެ ޖެންސެޓަކާއި 150 ކިލޯވޯޓުގެ ޖެންސެޓެއް ބޭނުންކޮށްގެންނެވެ. ނަމަވެސް ރަށުގެ ޑިމާންޑާ އެއްވަރަށް ކަރަންޓު ފޯރުކޮށްދިނުމުގައި ދަތިތަކެއް ހުރުމާއެކު، އަލަށް މި އިތުރުކުރެވޭ 400 ކިލޯވޯޓުގެ ކެޕޭސިޓީއާއެކު އެ ރަށަށް ދިމާވެފައިވާ ކަރަންޓުގެ ދަތިތަކަށް ބޮޑު ޙައްލެއް ލިބިގެންދާނެކަމަށް ވެސް ބުނެފައިވެއެވެ.

ރ. އިންނަމާދޫގެ ޙާލަތަށް ބަލާއިރު، އެ ރަށުގައި މިހާރު ޚިދުމަތް ދިނުމަށް 3 ޖެންސެޓް ބޭނުންކުރަމުންދެއެވެ. ފެނަކައިން ބުނީ އެ ރަށުގެ އިންސްޓޯލްޑް ކެޕޭސިޓީއަކީ ޖުމްލަ 1000 ކިލޯވޯޓު ކަމަށްވީ ނަމަވެސް، ރަށަށް ބޭނުންވާ ކަރަންޓު ފޯރުކޮށްދިނުމަށް ހުރިހާ ޖެނެރޭޓަރެއް އެއްފަހަރާ ހިންގަން ޖެހުމަކީ ޚިދުމަތަށް ބުރޫއެރުމުގެ ފުރުސަތު އޮތް ކަމެއްކަމަށެވެ. އެހެންކަމުން އަލަށް ގެނެވުނު 400 ކިލޯވޯޓުގެ ޖެންސެޓާއެކު، ކަރަންޓުގެ ޚިދުމަތް މެދުނުކެނޑި އިތުބާރާއެކު ފޯރުކޮށްދިނުމުގެ މަގު ފަހިވެގެންދާނެކަމުގެ ޔަޤީންކަން ވަނީ ދީފައެވެ.

މި ދެ ރަށަށް ގެނެވުނު އައު ޖެންސެޓްތައް އިންސްޓޯލްކޮށް ޚިދުމަތަށް ނެރުމުން، ރައްޔިތުންނަށް ފޯރުކޮށްދޭ ކަރަންޓުގެ ޚިދުމަތުގެ ފެންވަރު ވަރަށް ބޮޑަށް ރަނގަޅުވެގެންދާނެ ކަމަށް ފެނަކަ ކޯޕަރޭޝަނުން މަޢުލޫމާތުދެއެވެ.