ދައުލަތުގެ އިއްޒަތްތެރިޔާ އިބްރާހީމް ރަޝާދު އަވަހާރަވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެ

ދިވެހި ދައުލަތަށް 45 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވި، ދައުލަތުގެ އިއްޒަތްތެރިޔާގެ ލަޤަބް އަރުވާފައިވާ މައްޗަންގޮޅީ އަލިތަރި އިބްރާހީމް ރަޝާދު، ދެމިއޮތުމުގެ އާލަމަށް ދަތުރުކުރެއްވުމާ ގުޅިގެން، އެ މަނިކުފާނުގެ ޢާއިލާއަށާއި ޚިދުމަތް ކުރެއްވި މުއައްސަސާތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

އިބްރާހީމް ރަޝާދު އަވަހާރަވީ، އާލާސްކަންފުޅާ އުޅުއްވާތާ ދުވަސްތަކެއް ވުމަށްފަހު، މިއަދު ހަވީރުގެ ވަގުތެއްގައެވެ. އަވަހާރަވިއިރު އުމުރުފުޅަކީ 78 އަހަރެވެ.

މި ހިތާމަވެރި ޚަބަރާ ގުޅިގެން ރައީސުލްޖުމްހޫރިއްޔާ ސޯޝަލް މީޑިއާގައި ހިއްސާކުރެއްވި މެސެޖެއްގައި ވިދާޅުވީ، އިބްރާހީމް ރަޝާދަކީ ދައުލަތުން ހަވާލުކުރެއްވި ކޮންމެ މަސްއޫލިއްޔަތެއް މުރާލިކަމާއި، ތެދުވެރިކަމާއި، ރޭވުންތެރިކަމާއެކު އަދާކުރެއްވުމުގައި ލާމަސީލު ނަމޫނާއެއް ކަމަށެވެ. އަދި އެއީ ޙިކްމަތްތެރި، ހިންގުންތެރި ޝަޚްޞިއްޔަތެއް ކަމަށާއި، ޤައުމަށް ގެއްލިގެން އެދިޔައީ ވަރަށް ބޭނުންތެރި، އަގުހުރި ތަޖުރިބާކާރެއް ކަމުގައިވެސް ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާގެ މެސެޖުގައި އިތުރަށް ބަޔާންކުރައްވާފައިވަނީ، މީގެ ވިއްސަކަށް އަހަރު ކުރިން ޓެކްނޮލޮޖީގެ ވަސީލަތްތައް މަދު ޒަމާނެއްގައިވެސް، ސަރުކާރުގެ އިދާރީ ހިންގުން ހަލުވިކޮށް، ރައްޔިތުންނަށް ދޭ ޚިދުމަތްތައް ފަސޭހަކުރުމުގައި އެ މަނިކުފާނު ކުރެއްވި މަސައްކަތްޕުޅުތަކަކީ ފާހަގަކޮށްލެވޭ ފަދަ މަސައްކަތްޕުޅުތަކެއް ކަމަށެވެ. އަދި ދައުލަތަށް ޚިދުމަތް ކުރެއްވުމުގައި އުޞޫލުތަކާއި ހަމަތައް ހިފެހެއްޓެވުމާއި، އަމާނާތްތެރިކަމާއެކު ރައްޔިތުންނާއި ވެރިންގެ އިތުބާރު އެ މަނިކުފާނު ހޯއްދަވާފައިވާ ކަމަށްވެސް ރައީސް ވިދާޅުވިއެވެ.

އަލްމަރްޙޫމް އިބްރާހީމް ރަޝާދަކީ ދައުލަތުގެ ގިނަ އިސް މަގާމުތަކެއް ފުރުއްވާފައިވާ ބޭފުޅެކެވެ. އޭގެ ތެރޭގައި ފާދިއްޕޮޅާއި ކޮޅުމަޑުލުގެ އަތޮޅުވެރިކަމާއި، 6 އަހަރަށްވުރެ ދިގު މުއްދަތެއްގައި ކޮމިޝަނަރ އޮފް އިލެކްޝަންސްގެ މަގާމު ހިމެނެއެވެ. ދައުލަތުގެ ޚިދުމަތުން 2008 ވަނަ އަހަރު ވަކިވެވަޑައިގެންނެވިއިރު އެ މަނިކުފާނު ހުންނެވީ މިނިސްޓަރ އޮފް ސްޓޭޓް، ޕްރިންސިޕަލް ކަލެކްޓަރ އޮފް ކަސްޓަމްސްގެ މަގާމުގައެވެ.

1961 ވަނަ އަހަރު ވުޒާރަތުއްތިޖާރާގެ ކާތިބުކަމުން ޚިދުމަތް ފެއްޓެވި އިބްރާހީމް ރަޝާދު ވަނީ، އެކި ވުޒާރާތަކުގެ ސެކްރެޓަރީ ކަމާއި، އެސް.ޓީ.އޯ.ގެ މެނޭޖަރުކަމާއި، މޯލްޑިވްސް ޕޯސްޓްގެ މެނޭޖިންގ ޑިރެކްޓަރުކަން ފަދަ ގިނަގުނަ މަގާމުތަކެއް ފުރުއްވާފައެވެ.

އަވަހާރަވިއިރު އަލްމަރްޙޫމް އިބްރާހީމް ރަޝާދުގެ އަނބިކަނބަލަކާއި ތިން އަންހެން ބޭފުޅުން ދުނިޔޭގައި އެބަތިއްބެވިއެވެ.