ސިވިލް އިންޖިނިއަރުންގެ ޖަމްޢިއްޔާގެ ޓީމެއް ތިލަމާލެ ބްރިޖް ސައިޓަށް ޒިޔާރަތްކޮށްފި

ތިލަމާލެ ބްރިޖް މަޝްރޫޢުގެ މަސައްކަތްތައް ކުރިއަށްދާ ގޮތް ބެއްލެވުމަށް ސިވިލް އިންޖިނިއަރުންގެ ޖަމްޢިއްޔާގެ ފަރާތުން އެޖަމިއްޔާގެ ޓީމެއް ބްރިޖްގެ ކޮންސްޓްރަކްޝަން ސައިޓަށް ޒިޔާރަތްކޮށްފިއެވެ.

މި ޒިޔާރަތުގައި ބައިވެރިވި ސިވިލް އިންޖިނިއަރުންނަށް ތިލަމާލެ ބްރިޖް މަޝްރޫޢުގެ އެކި ބައިތަކުގެ މަސައްކަތް ކުރިއަށްދާ ގޮތް ބަލައި، މަޝްރޫޢުގެ ޓެކްނިކަލް މަޢުލޫމާތު އޮޅުންފިލުވުމުގެ ފުރުޞަތު ލިބިގެންދިޔައެވެ. މިއީ މިނިސްޓަރ އޮފް ކޮންސްޓްރަކްޝަން އެންޑް އިސްފްރަސްޓްރަކްޗަރ ޑރ. ޢަބްދުالله މުއްޠަލިބް އިސްނަންގަވައިގެން މިފަދަ ތާރިޙީ ބޮޑެތި ބިޔަ މަޝްރޫއުތަކަށް ދާ ފަންނީ އަދި ސްޓްރަކްޗަރަލް މަސައްކަތާއި މިންވަރު ބެލުމުގެ ފުރުސަތު އެކި ބެކްގްރައުންޑް ތަކުގެ ދަރިވަރުންނަށާއި މިކަމުގެ ދިރާސާތައް ކުރާ މާހިރުންނަށް ފަހިކޮއްދެއްވުމުގެ ގޮތުން ރާވާ ހިންގަވަމުން ގެންދަވާ ޒިޔާރަތްތަކެކެވެ.

މިފަދަ ޒިޔާރަތްތަކުން ރާއްޖޭގެ އިންޖިނިއަރިންގ ދާއިރާގެ ތަޖުރިބާކާރުންނަށް މި މަޝްރޫޢުން ގިނަގުނަ ފައިދާތަކަކާއި އާ މަޢުލޫމާތުތަކެއް ލިބިގެންދާނެ ކަމަށް އެމަނިކުފާނު ދެކިވަޑައިގަންނަވައެވެ. ދިގުމިނުގައި 6.9 ކިލޯމީޓަރ ހުންނަ ތިލަމާލެ ބްރިޖަކީ ސަރުކާރުން އެންމެ އިސްކަމެއްދެއްވައިގެން ކުރިއަށްގެންދާ މެގަ އެއް މަޝްރޫއެކެވެ. މިހާތަނަށް މަޝްރޫއުގެ 40 ޕަސެންޓަށްވުރެ ބޮޑުބައި ނިމިފައިވާއިރު ބްރިޖުގެ މަސައްކަތް އެކީ ނިންމުމަށް 500 މިލިއަން ޑޮލަރު ހޭދަވާނެކަމަށް ސަރުކާރުން ލަފާކުރައްވައެވެ.