ކެލައަށް ރިކޯޑް އަދަދަކަށް ވާރޭވެހެފި

ރާއްޖެއަށް މިހާރު ކުރަމުންދާ ވިއްސާރާގައި ހއ ކެލާއަށް ރިކޯޑް މިންވަރަކަށް ވާރޭވެހިއްޖެއެވެ. 

އެގޮތުން މޫސުމާއި ބެހޭ ގައުމީ އިދާރާއިން ބުނީ އިއްޔެ ކެލާ އަށް 231.5 މިލިލީޓަރުގެ ވާރޭވެހިފައިވާކަމަށެވެ. މިއީ މިހާތަނަށް އޮޓަމެޓިކް ވެދަރ ސްޓޭޝަނަކުން ސައުވީސް ގަޑިއިރަށް ރެކޯޑްކުރެވިފައިވާ އެންމެ މަތީ އަދަދެވެ. އަދި ވިލާގަނޑުގައި އެންމެ ވައިގަދަވެފައިވާކަމަށް ރެކޯޑު ކުރެވިފައިވަނީ، އިއްޔެ ގަޑިއަކު 46 މޭލަށް ފ.ނިލަންދޫ އޮޓަމެޓިކް ވެދަރ ސްޓޭޝަނުންނެވެ.

ކުރިއަށް 5 ދުވަހުވެސް ރާއްޖޭގެ ބޮޑުބަޔަކަށް ގުގުރުމާއިއެކު ވިއްސާރަކުރާނެކަމަށް ލަފާކުރެވެއެވެ. މީގެއިތުރުން އާންމުވައި އުތުރާއި މެދުރާއްޖެތެރޭގައި ގަޑިއަކު 17 މޭލާއި 27 މޭލާދެމެދު، އަދި ދެކުނުގައި ގަޑިއަކު 13 މޭލާއި 23 މޭލާދެމެދު ބާރުމިނުގައި ހިފަހައްޓާނެކަމަށް ބެލެވެއެވެ. އަދި ވިލާގަނޑުގައި ގަޑިއަކު 60 މޭލަށް ވައިގަދަވެގެން ދިއުމުގެ ފުރުސަތު ބޮޑެވެ. އެހެންކަމުން ރާއްޖޭގެ ހުރިހާ ސަރަހައްދެއްގައި ކަނޑުތައް ގަދަވެ، ވިލާގަނޑުގައި ވަރަށް ގަދަވާނެކަމަށް ލަފާކުރެވެއެވެ. އަދި ދިޔަވަރު ބޮޑުވާ ގަޑީގައި އުދައިގެ އަސަރުކުރުން އެކަށީގެންވެއެވެ.

މޫސުން ގޯސްދުވަސްވެރެއްކަމުން އެންމެހައި ފަރާތްތަކުން މޫސުމަށް ސަމާލުވުމަށް އިލްތިމާސްކުރަމެވެ. އަދި ކަނޑުތައް ވަރަށް ގަދަވާނެކަމަށް ލަފާކުރެވޭތީ ކަނޑުދަތުރުފަތުރުކުރާ ފަރާތްތަކުން މިކަމަށް ސަމާލުވެ، ސަލާމަތީ ކަންކަމަށް އިސްކަންދެއްވުމަށް އިލްތިމާސްކުރަމެވެ.