ބޭރުގައި ކިޔަވާ ދަރިވަރުންގެ މައްސަލަތަކަށް ޖަވާބުދޭ މުއްދަތު 4 ދުވަހަށް ކުޑަކޮށްފި

ރާއްޖެއިން ބޭރުގައި ތަޢުލީމު ހާސިލުކުރަމުންދާ ދިވެހި ދަރިވަރުން ހުށަހަޅާ އެކި މައްސަލަތަކަށް ޖަވާބު ދިނުމަށް ކުރިން ހޭދަވާ ހަތަރު ހަފްތާގެ މުއްދަތު، ހަތަރު ދުވަހަށް ކުޑަކުރެވިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.

ދައުލަތުގެ މީޑިއާއިން ގެނެސްދިން "ނޭޝަން ޗެޓް" ޕްރޮގްރާމުގައި ވާހަކަފުޅު ދައްކަވަމުން ރައީސް ވިދާޅުވީ، ބޭރުގައި ކިޔަވާ ދަރިވަރުންނާއި އެ ދަރިވަރުންގެ އާއިލާތަކަށް ކުރިމަތިވާ މައްސަލަތަކަށް ޖަވާބު ލިބުން ލަސްވުމަކީ ވަރަށް ބޮޑު ތަކުލީފެއް ކަމަށެވެ. ނަމަވެސް، ސަރުކާރުގެ ހިންގުމަށާއި ކެބިނެޓަށް ގެނެވުނު ބަދަލުތަކުގެ ހެޔޮ ނަތީޖާ މިހާރު ފެންނަން ފަށާފައިވާކަން އެމަނިކުފާނު ފާހަގަކުރެއްވިއެވެ.

"މިއީ ސަރުކާރުގެ މަސައްކަތުގެ ހަލުވިކަން ނުވަތަ އެފިޝިއެންސީ އިތުރުވެފައިވާކަމުގެ ރީތި މިސާލެއް. އަޅުގަނޑުމެންގެ އަމާޒަކީ މި މުއްދަތު އަދިވެސް އިތުރަށް ކުޑަކުރުން،" ރައީސް ވިދާޅުވިއެވެ.

ސަރުކާރުގެ ބައެއް މިނިސްޓްރީތަކާއި ކެބިނެޓަށް ގެނައި ބަދަލުތަކާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ލޯކަލް ކައުންސިލް އިންތިޚާބުގެ ނަތީޖާއާއި އާންމުންގެ ޚިޔާލުތަކަށް ބަލާއިރު، ސަރުކާރުގެ ހިންގުމަށް އިޞްލާޙީ ބަދަލުތަކެއް ގެނައުމަށް ރައްޔިތުން އެދޭކަން ހާމަވާ ކަމަށެވެ. އެގޮތުން ގެނެވުނު ބަދަލުތަކަކީ އުނިކަންތައްތައް ރަނގަޅުކޮށް، ސަރުކާރުގެ ސިޔާސަތުތައް ތަންފީޒުކުރުމުގައި އިތުރު ކުރިއެރުން ހޯދުމަށް ކުރެވުނު މަސައްކަތެއް ކަމަށް އެމަނިކުފާނު ވިދާޅުވިއެވެ.

ކެބިނެޓަށް ގެނެވުނު ބަދަލުތަކަށްފަހު ބައެއް މިނިސްޓްރީތަކުގެ ހިންގުމަށް ބޮޑެތި ކުރިއެރުންތަކެއް ލިބިފައިވާކަން ފާހަގަކުރައްވަމުން ރައީސް ވިދާޅުވީ، ކުރީގެ މިނިސްޓަރުންވެސް މަސައްކަތް ކުރެއްވީ ތެދުވެރިކަމާއެކު ކަމަށެވެ. ނަމަވެސް، ބަދަލުތައް ގެނައީ އިތުރު ނަތީޖާ ހާސިލުކޮށް، ރައްޔިތުންނަށް ދެވޭ ޚިދުމަތްތައް ހަރުދަނާ ކުރުމަށް ކަމަށް އެމަނިކުފާނު ވިދާޅުވިއެވެ.

ރައީސް ޑރ. މުޢިއްޒު އިތުރަށް ވިދާޅުވީ، ސަރުކާރުގެ ޚިދުމަތްތަކުގެ ފެންވަރު ރަނގަޅުކުރުމަށް ބޭނުންވާ ކޮންމެ ބަދަލެއް ގެނައުމަށް ސަރުކާރު އޮތީ ތައްޔާރަށް ކަމަށެވެ. އަދި އާންމުންނަށް ޚިދުމަތް ދިނުމުގައި މިނިސްޓްރީތަކުން މިހާރަށްވުރެ ފަސޭހަ އަދި އަވަސް އިންތިޒާމުތަކެއް ހަމަޖެއްސުމަށް އިރުޝާދު ދެއްވާފައިވާނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.