މިއަދުގެ ޢީދު ޚުޠުބާގައި ޢީދުގެ އަދަބުތަކާއި މުސްލިމުންގެ އެއްބައިވަންތަކަމުގެ މައްޗަށް އަލިއަޅުވާލައިފި

މިއަދު، 10 ذُو الْހިއްޖަ 1447 (27 މެއި 2026) ވީ ބުދަ ދުވަހު، ރާއްޖޭގެ އެކި ކަންކޮޅުތަކުގައި ބޭއްވި އަޟުޙާ ޢީދުގެ ބޮޑު ޖަމާޢަތުގައްޔާއި މިސްކިތްތަކުގައި އިއްވި ޢީދު ޚުޠުބާގައި، ޢީދުގެ އަދަބުތަކާއި، އިބްރާހީމް ޢަލައިހިއްސަލާމްގެ މަތިވެރި ޤުރުބާނީ އަދި މުސްލިމް އުންމަތުގެ އެއްބައިވަންތަކަމުގެ މައްޗަށް މުހިންމު ނަސޭހަތްތަކެއް ދީފިއެވެ.

މިއަދުގެ ޚުޠުބާގައި ބަޔާންކުރި ގޮތުގައި، އަޟުޙާ ޢީދު ދުވަހަކީ މުޅި އަހަރުތެރޭގައި އަންނާނެ އެންމެ މާތް ދުވަސްތަކުގެ ތެރެއިން ދުވަހެކެވެ. ޢީދުގައި މާތް ﷲ ދެއްވި ނިޢުމަތްތަކަށް ޝުކުރުވެރިވެ، ގިނަގިނައިން ތަކުބީރު ކިޔުމަކީ ގަދަވެގެންވާ ސުންނަތެއްކަން ޚުޠުބާގައި ފާހަގަކުރިއެވެ. މިގޮތުން ޢަރަފާތު ދުވަހުގެ ފަތިސް ނަމާދުން ފެށިގެން އައްޔާމުއްތަޝްރީޤުގެ ތިންވަނަ ދުވަހުގެ ޢަޞްރު ނަމާދާ ހަމައަށް ކޮންމެ ފަރުޟު ނަމާދެއްގެ ފަހުގައި ތަކުބީރު ކިޔުމަށް ވަނީ އިރުޝާދު ދީފައެވެ.

އަޟުޙާ ޢީދުގެ މުހިންމު އެއް އަޅުކަން ކަމުގައިވާ އުޟުޙިޔާ ކަތިލުމާ ގުޅޭގޮތުން ޚުޠުބާގައި ބުނީ، މިއީ އިބްރާހީމްގެފާނާއި އެކަލޭގެފާނުގެ ދަރިކަލުން އިސްމާޢީލްގެފާނު މާތް ﷲގެ އަމުރުފުޅަށް ކިޔަމަންތެރިވެވަޑައިގެން ވެވަޑައިގަތް މަތިވެރި ޤުރުބާނީގެ ހަނދާން އާކޮށްދޭ ކަމެއް ކަމަށެވެ. އަދި އުޟުޙިޔާ ކަތިލުމަކީ ކީރިތި ރަސޫލާ ﷺ ވެސް ކުރެއްވި ގަދަވެގެންވާ ސުންނަތެއްކަން ޚުޠުބާގައި ހަނދާންކޮށްދިނެވެ.

ޢީދު ފާހަގަކުރުމުގައި ހިފަހައްޓަންޖެހޭ އަދަބުތަކަށް އަލިއަޅުވާލަމުން، އިސްލާމީ ޝަރީޢަތާ ޚިލާފު ކަންކަމުން ދުރުހެލިވުމަށް ޚުޠުބާގައި ވަނީ ގޮވާލާފައެވެ. އެގޮތުން މީހުންނަށް ފުރައްސާރަކުރުމާއި، ދެޖިންސު މަސްހުނިވެގެން ކުޅިވަރު ކުޅުމާއި، އިސްލާމީ ސަގާފަތާ ނުގުޅޭ ކަންކަމުން ދުރުހެލިވުމަށް ނަސޭހަތްތެރިވިއެވެ. އަދި ޢީދުގެ ހަރަކާތްތައް އިންތިޒާމުކުރާ ފަރާތްތަކުން މާތް ﷲއަށް ބިރުވެތިވެ، އެހެން ދީންތަކުގެ ޝިޢާރުތަކާ އެއްގޮތްވާ ކަންކަމުން ދުރުހެލިވުމަކީ ވާޖިބެއްކަމުގައި ބަޔާންކުރިއެވެ.

މީގެ އިތުރުން، ރާއްޖޭގައި މަސައްކަތްކުރާ ބިދޭސީ މުސްލިމުން ޢީދުގެ އުފަލުގައި ބައިވެރިކުރުމަށާއި، ދުނިޔޭގެ އެކި ކަންކޮޅުތަކުގައި ނިކަމެތި ހާލުގައި ތިބި މުސްލިމުންގެ މަތިން ހަނދާންކޮށް، އެފަރާތްތަކަށް ހެޔޮ ދުޢާކުރުމަށް ޚުޠުބާގައި ވަނީ ބާރުއަޅާފައެވެ. ޚާއްޞަކޮށް ޤަތުލުޢާންމުތަކާއި ހައިހޫނުކަމުގެ ބިރުވެރިކަމުގައި ތިބި އަޚުންނަށް ނަޞްރާއި ކާމިޔާބަށް އެދި ދުޢާކުރުމަށް ގޮވާލިއެވެ.

ޚުޠުބާ ނިންމާލަމުން، މިއަދުގެ މި ބޮޑު ޖަމާޢަތުން ޤިޔާމަތް ދުވަހުގެ މަޙުޝަރުގެ މައިދާން ހަނދާންކޮށްދޭ ކަމަށް ބުނެ، އެކަކު އަނެކަކަށް މަޢާފުކޮށް، ހިތްތައް ސާފުކުރުމަށް އިލްތިމާސްކުރިއެވެ. ބޮޑާކަމާއި ޙަސަދަވެރިކަމުން ހިތްތައް ތާހިރުކޮށް، ސަލާމަތް ހިތަކާއިގެން މާތް ﷲއާ ބައްދަލުކުރުމަށް ތައްޔާރުވުމަށް ޚުޠުބާގައި ނަސޭހަތްތެރިވިއެވެ.