މިސްކިތްތަކުން ބޭރަށް އަޑު ނުއިވޭ ގޮތައް އަޑު ކަނޑާލަން މިނިސްޓްރީން އެންގިވާހަކައަކީ ދޮގެއް: މިނިސްޓަރ

ނަމާދު ގަޑީގައި މާލެ ސިޓީގެ ހުރިހައި މިސްކިތްތަކުން ބޭރަށް އަޑު ނުއިވޭ ގޮތަށް އަޑު ކަނޑާލަން މިނިސްޓްރީން އެންގި ކަމަށް ބުނެ ފަތުރަމުންދާ ވާހަކައަކީ ހަގީގަތާ ހިލާފު ވާހަކައެއް ކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޝަހީމް މިފަދައިން ވިދާޅުވީ ރޭ ޝެއިޚް ނިޝާންގެ ރަސްމީ ފޭސްބުކް ޕޭޖުގައި ހިއްސާކުރެއްވި ވީޑިއޯއެއްގައި، މިސްކިތްތަކުގެ އިމާމުން އިސްލާމިކް މިނިސްޓްރީއަށް ގެންގޮސް، ނަމާދުކުރާ އަޑު އިވޭ ގޮތަށް ބޭރަށް ހުންނަ ތާޅަފިލި ނުވަތަ ސްޕީކަރުތަކުގެ އަޑު ކަނޑުވާލުމަށް އަންގާފައިވާ ކަމަށް ވިދާޅުވުމާއި ގުޅިގެންނެވެ. ޝެއިޚް ވިދާޅުވީ މިސްކިތްތަކަކީ މާތްﷲގެ ގެކޮޅުތައް ކަމަށްވާއިރު، އެ ތަންތަނުގެ އަޑު ކަނޑުވާލުމަކީ ހިތާމަހުރި ކަމެއް ކަމަށެވެ.

މާލެ ސިޓީގެ ބައެއް މިސްކިތްތަކުގެ ނަމާދުކުރާ އަޑު ތާޅަފިލިން ކަނޑާލަން އިސްލާމިކް މިނިސްޓްރީން އަންގާފައިވާ ކަމަށް ބުނެ، ދީނީ އިލްމުވެރިޔާ ޝެއިޚް އާދަމް ނިޝާން ބިން އަލީ އާދަމް ކަންބޮޑުވުން ފާޅުކޮށްފައިވީ ނަމަވެސް މިނިސްޓަރ ޝަހީމް ވަނީ އެއީ ކަނޑައެޅިގެން ދޮގެއް ކަމަށް ވިދާޅުވެ އެ ވާހަކަތައް ދޮގުކުރައްވާފައެވެ.

މިސްކިތްތަކުގެ ބަންގީގެ އަޑާއި ނަމާދުކުރާ އަޑު މިސްކިތުން ބޭރަށް އިވޭގޮތަށް ހަދަން އިސްލާމިކް މިނިސްޓްރީ އިން މީގެ ކުރިން ވެސް އިމާމުންނަށް އަންގާފައިވެއެވެ.