ޝަހުޒާން ހަދަނީ "100 ޕަސެންޓް ދޮގު"، ޖަލު ގޮޅިން ފޯނު ފެނުނު: މިނިސްޓަރ އިހުސާން

ޖަލުގައި ބަންދުކޮށްފައި ހުރި ދުވަސްވަރު ކަން ހިނގައިދިޔަ ގޮތާ ގުޅޭގޮތުން ނޫސްވެރިޔާ ޝަހުޒާން ބުނަމުންދާ ވާހަކަތަކަކީ "100 ޕަސެންޓް ދޮގު" ވާހަކަތަކެއް ކަމަށް ހޯމް މިނިސްޓަރ ޢަލީ އިހުސާން ވިދާޅުވެއްޖެއެވެ.

މިނިސްޓަރ އިހުސާން މިހެން ވިދާޅުވީ، ޝަހުޒާން ޖަލުން މިނިވަންވުމަށްފަހު އޭނާއަށް ދިމާވި ކަންކަމާ ގުޅޭގޮތުން "އަދަދު" ނޫހުން ތައްޔާރުކޮށް ސޯޝަލް މީޑިއާގައި އާންމުކޮށްފައިވާ ވީޑިއޯއަކަށް އެކްސް މެދުވެރިކޮށް ރައްދު ދެއްވަމުންނެވެ.

މިނިސްޓަރ ވިދާޅުވި ގޮތުގައި، 15 މޭ 2026 ވީ ދުވަހުގެ ރޭގަނޑު 19:35 ހާއިރު، އާންމު ފަރާތަކުން ލިބުނު މަޢުލޫމާތަކާ ގުޅިގެން ކަރެކްޝަންސްގެ އޮފިސަރުން ވަނީ ޝަހުޒާން އާއި ލީވާން ތިބި ގޮޅި ބަލައި ފާސްކޮށްފައެވެ. މި ފާސްކުރުމުގެ ތެރެއިން އެ ގޮޅީގައި ހުރި ކަބަޑެއްގެ ތެރޭގައި ހުރި އަންނައުނުތަކުގެ ތެރެއިން މޯބައިލް ފޯނެއް ފެނިފައިވާ ކަމަށް އިހުސާން ހާމަކުރެއްވިއެވެ.

ޝަހުޒާން މި ހަދަނީ ކަނޑައެޅިގެން 100 ޕަސެންޓް ދޮގު. މި ކަމާ ގުޅިގެން ޖަލުގެ އެހެން ގައިދީންނާ މެދުވެސް އަމަލުކުރާ އުސޫލުން، އެ ދެ މީހުން ވަނީ މޮނިޓަރ ކުރެވޭ ގޮތަށް ވަކި ދެ ގޮޅިއަކަށް ބަދަލުކޮށްފައި،

މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ ޖަލުގައި ހިންގާ މިފަދަ އޮޕަރޭޝަންތަކަކީ ވަކި ގައިދީއަކަށް އަމާޒުކޮށްގެން ނުވަތަ ވަކި ފަރާތަކުން އަންގައިގެން ކުރާ ކަންކަން ނޫން ކަމަށެވެ. އަދި ޖަލުގެ މިފަދަ އިދާރީ ކަންކަމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮތް ނިންމަވާ ކަންކަމެއް ނޫން ކަމަށާއި، ރައީސް ދުވަހަކުވެސް ޖަލުގެ މިފަދަ ކަމަކާ ގުޅިގެން އެއްވެސް އިރުޝާދެއް ދެއްވާފައި ނުވާ ކަމަށްވެސް މިނިސްޓަރ ވިދާޅުވިއެވެ.

މީގެ އިތުރުން، މި މައްސަލައާ ގުޅިގެން ރާއްޖޭގެ ތިން ނޫސްވެރިއަކު މީގެ ކުރިން ސުވާލު ކުރުމުން، ކަން ހިނގި ގޮތުގެ ހަގީގަތް ކިޔައިދީފައިވާނެ ކަމަށް އިހުސާން ވިދާޅުވިއެވެ. ނަމަވެސް އެއްވެސް މީޑިއާއަކުން އެ މަޢުލޫމާތު ރައްޔިތުންނަށް ސާފުކޮށްދީ ރިޕޯޓްކޮށްފައި ނުވާތީ މިނިސްޓަރ ވަނީ ކަންބޮޑުވުން ފާޅުކުރައްވާފައެވެ.

ޖަލަށް މަނާ ތަކެތި ވެއްދި ކަމަށް ތުހުމަތު ކުރެވޭ މި މައްސަލަ މޯލްޑިވްސް ޕޮލިސް ސާވިސްއިން މިހާރު ގެންދަނީ އިތުރަށް ތަހުގީގު ކުރަމުންނެވެ.