ތިމާވެށި ރައްކާތެރިކުރުމުގެ ސިޔާސަތުތައް ހަރުދަނާކުރުމަށް މިނިސްޓަރާއި ޕޮލިސް ކޮމިޝަނަރ ބައްދަލުކުރައްވައިފި

ތިމާވެށި ރައްކާތެރިކުރުމުގެ ސިޔާސަތުތައް އިތުރަށް ހަރުދަނާކުރުމަށްޓަކައި، މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނަރޖީ ތާރިޤް އިބްރާހީމް އާއި ކޮމިޝަނަރ އޮފް ޕޮލިސް އަލީ ސުޖާއު ބައްދަލުކުރައްވައިފިއެވެ.

މި ބައްދަލުކުރެއްވުމުގައި މޯލްޑީވްސް ޕޮލިސް ގެ އިސްވެރިންނާއި މިމިނިސްޓްރީގެ އިސްވެރިން ބައިވެރިވެވަޑައިގެންނެވިއެވެ.

މިއަދު އެންވަޔަރަމަންޓް މިނިސްޓްރީގައި ބޭއްވުނު މި ބައްދަލުވުމުގައި، ރާއްޖޭގެ ތިމާވެށްޓަށް ކުރިމަތިވެފައިވާ ގޮންޖެހުންތަކާ ކުރިމަތިލުމުގައި އެންވަޔަރަންމަންޓަލް ޕޮލިސްގެ މުހިންމު ދައުރާ ބެހޭގޮތުން މަޝްވަރާކުރެވުނެވެ. އަދި މި ދާއިރާގައި ދިމާވާ މައްސަލަތައް ޙައްލުކުރުމަށް ދެ މުއައްސަސާގެ މެދުގައި އޮންނަ ގުޅުން އިތުރަށް ބަދަހިކުރުމުގެ މުހިންމުކަން ފާހަގަކުރެވުނެވެ.

މިނިސްޓަރ ތާރިޤް އިބްރާހީމް ވިދާޅުވީ، ރާއްޖޭގެ ތިމާވެށި ރައްކާތެރިކުރުމަކީ ސަރުކާރުގެ އެންމެ އިސް އަމާޒުތަކުގެ ތެރޭގައި ހިމެނޭ ކަމެއް ކަމަށާއި، މި މަސައްކަތުގައި ފުލުހުންގެ އެހީތެރިކަމަކީ ކޮންމެހެން ބޭނުންވާ ކަމެއް ކަމުގައެވެ.

ކޮމިޝަނަރ އޮފް ޕޮލިސް އަލީ ސުޖާއު ވިދާޅުވީ، ތިމާވެށި ރައްކާތެރިކުރުމުގެ މަސައްކަތުގައި ފުލުހުން އަބަދުވެސް ސަރުކާރަށް އެހީތެރިވެދޭނެ ކަމަށާއި، އެންވަޔަރަންމަންޓަލް ޕޮލިސްގެ ޤާބިލުކަން އިތުރަށް ރަނގަޅުކުރުމަށް މަސައްކަތްކުރާނެ ކަމަށެވެ.

މި ބައްދަލުވުމުގައި، ކުރިއަށް އޮތް ތަނުގައި ދެ މުއައްސަސާގެ މެދުގައި އިތުރު މަޝްވަރާތައް ކުރިއަށް ގެންދިއުމަށް ވެސް އެއްބަސްވެވުނެވެ.