އިދިކޮޅުގެ "ފިތުނަ" މެޝިނަށް ޝިޔާމްގެ ވަރުގަދަ ހަމަލާއެއް: 'އަދަދު' އޮންނަންވީ ސިޔާސީ ޕާޓީއެއްގެ ގޮތުގައި އީސީގައި!
"އަދަދު" ނޫހަކީ ނޫސްވެރިކަމުގެ މިންގަނޑުތަކުން ބޭރުވެ، ހަމައެކަނި ފިތުނަ އުފެއްދުމަށް މަސައްކަތްކުރާ ސިޔާސީ މުއައްސަސާއެއްގެ ގޮތުގައި ސިފަކުރައްވައި، ސަރުކާރު ހިންގާ މައި ޕާޓީ ޕީ.އެން.ސީގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް އެ ނޫހަށް ވަރުގަދަ ރައްދެއް ދެއްވައިފިއެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު ޝިޔާމް ވިދާޅުވީ، 'އަދަދު' މިވަގުތު ރެޖިސްޓްރީވެފައި އޮތީ މުޅިން ނުބައި މުއައްސަސާއެއްގައި ކަމަށެވެ. އެ ނޫހުގެ އަމަލުތައް ހުރިގޮތުން، އަސްލު އެ ނޫސް އޮންނަންޖެހެނީ ސިޔާސީ ޕާޓީއެއްގެ ގޮތުގައި އިލެކްޝަންސް ކޮމިޝަންގައި ރެޖިސްޓްރީވެފައި ކަމަށް ޝިޔާމް ވިދާޅުވިއެވެ. އޭނާ ފާހަގަކުރެއްވި ގޮތުގައި 'އަދަދު' ނޫހުން ޚަބަރު ލިޔަނީ ރައްޔިތުންގެ މެދުގައި ނުތަނަވަސްކަމާއި ފިތުނަ އުފެއްދުމުގެ ބޭނުމުގައެވެ.
"އަދަދުން ޚަބަރު ލިޔާނަމަ ފިތުނަ އުފެއްދުން ނޫން ކަމެއް ނުކުރެވޭ. ވާދަވެރި ސިޔާސީ ޕާޓީތަކެކޭ 'އަދަދު' ނޫހެކޭ ހަމަ އެއްވެސް ތަފާތެއް ނެތް" މިނިސްޓަރ ޝިޔާމް ވިދާޅުވިއެވެ.
މީގެ އިތުރުން ޝިޔާމް ފާހަގަކުރެއްވީ ޕީ.އެން.ސީ އަކީ ރާއްޖޭގައި މިހާތަނަށް އުފެދުނު އެންމެ މެންބަރުން ގިނަ، އެންމެ ވަރުގަދަ ޕާޓީ ކަމަށެވެ. އަދި ޕާޓީގެ އެތެރޭގެ ޑިމޮކްރެސީއަށް އަލިއަޅުވާލައްވަމުން ޝިޔާމް ވިދާޅުވީ، ޕާޓީގެ ރައީސް ޑރ. މުޙައްމަދު މުޢިއްޒު ދުވަހަކުވެސް ނުފޫޒުން ކަމެއް ނިންމަވަން މަސައްކަތް ކުރައްވާފައި ނުވާ ކަމަށެވެ. އޭގެ ބަދަލުގައި، މަޖިލިސް މެންބަރުންނާ ބައްދަލުކުރެއްވުމުގައިވެސް އަދި ލީޑަރޝިޕްގައިވެސް ކަންކަން ނިންމަވަނީ އެންމެންގެ އިއްތިފާގުން ނުވަތަ އަޣުލަބިއްޔަތުން ކަމަށް ޝިޔާމް ވިދާޅުވިއެވެ.
ޝިޔާމްގެ މި ވާހަކަތަކުން ދޭހަވަނީ، ސަރުކާރުން ހިންގާ ޕީ.އެން.ސީ އަކީ ނަމޫނާ ޑިމޮކްރެޓިކް ޕާޓީއެއް ކަމާއި، 'އަދަދު' ފަދަ ނޫސްތަކުން ފަތުރަނީ އެއްވެސް އަސާސެއް ނެތް ދޮގު ވާހަކަތަކެއް ކަމެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
