ބުޅާމަސް ބޭނުންކޮށްގެން ކާތަކެތި ތައްޔާރުކޮށް ވިއްކާކަމަށް ތުހުމަތުކުރާ އަރަފާތު ހޯދުމަށް އިއުލާންކޮށްފި

ބުޅާމަސް ބޭނުންކޮށްގެން ކާބޯތަކެތި ތައްޔާރުކުރާކަމަށް ތުހުމަތު ކުރެވިފައިވާ ބަންގްލަދޭޝްގެ ރައްޔިތެއްކަމަށްވާ އަރަފާތު ހޮސައިން ހޯދުމަށް މޯލްޑިވްސް އިމިގްރޭޝަނުން މިއަދު ނޯޓިސްއެއް ނެރެފިއެވެ.

އޭނާ ހޯދުމަށް އިމިގްރޭޝަނުން ނެރެފައިވާ ނޯޓިހުގައި ބުނީ، ފަސް ދުވަހުގެ ތެރޭގައި އެ އިދާރާއަށް ހާޒިރުވާން އަންގާފައެވެ. އެ އިދާރާއަށް ހާޒިރުވާން އަންގާފައިވަނީ އަރަފާތު ނަމަކަށް ކިޔާ ބަނގަލަދޭޝް މީހެކެވެ. 

އިމިގްރޭޝަނުން ހޯދުމަށް އިއުލާނުކުރި އަރަފާތަކީ އޭނާ އާމެދު ބައެއް އާއްމު ފަރާތަކުން ވަރަށް ސީރިއަސް ތުހުމަތުތަކެއް ކުރެވޭ މީހެކެވެ. މިގޮތުން މާލެ ސަރަހައްދުގައި ގިނަވެފައިވާ ބުޅާތައް ބަލަހައްޓަމުން އަންނަ އަމިއްލަ ޖަމިއްޔާއެއް ކަމުގައިވާ ފެލައިން ވެލްފެއާ އޯގަނައިޒޭޝަނުންވެސް ވަނީ އަރަފާތުގެ މައްސަލަ އެންމެންގެ ސަމާލުކަމަށް ގެނެސްފައެވެ. 

އަރަފާތުގެ ކަންކަން އެނގޭ ބައެއް މީހުންވެސް ވަނީ އޭނާ އާ ގުޅޭ ބައެއް ވާހަކަތައް ސޯޝަލް މީޑިއާގައި ހިއްސާކޮށްފައެވެ. މިގޮތުން އަރަފާތު ދިރިއުޅެމުންދާ ގޭދޮށުން ބުޅަލުގެ ގުނަވަންތައް ފެނިފައިވާކަމަށް އަވައްޓެރިން ބުނެފައިވާކަމަށް އެފަރާތްތަކުން ވަނީ ފާހަގަކޮށްފައެވެ.