ސިވިލް ސާވިސްގެ 35 މުވައްޒަފަކު ތަމްރީނު ފުރިހަމަކުރުމަށް އިންޑިއާއަށް ފުރައިފި
ދިވެހި ސިވިލް ސާވިސްގެ 35 މުވައްޒަފަކު ތަމްރީނު ޕްރޮގްރާމެއް ފުރިހަމަކުރުމަށް އިންޑިއާގެ ޑެހްރަދޫނަށް ފުރައިފިއެވެ.
މި މުވައްޒަފުންނަށް އަލްވަދާއު ކިޔުމަށް މިއަދު ބޭއްވި ރަސްމިއްޔާތުގައި، އިންޑިއާއިން ދިވެހިރާއްޖެއަށް ކަނޑައަޅާފައި ހުންނަވާ ޑެޕިއުޓީ ހައި ކޮމިޝަނަރު ގޯރަވް ތާކުރް ވަނީ ބައިވެރިވެވަޑައިގެންފައެވެ.
މި ތަމްރީނު ޕްރޮގްރާމަކީ އިންޑިއާގެ ނޭޝަނަލް ސެންޓަރ ފޯ ގުޑް ގަވަރނަންސް (އެން.ސީ.ޖީ.ޖީ) އާއި ދިވެހިރާއްޖޭގެ ސިވިލް ސާވިސް ކޮމިޝަނާ ދެމެދު ވެފައިވާ ފަހުމުނާމާގެ ދަށުން ކުރިއަށްގެންދާ ސިލްސިލާ ތަމްރީނުތަކުގެ ބައެކެވެ. މި މަހުގެ 8 އިން 19 އަށް އިންޑިއާގެ ޑެހްރަދޫނުގައި ކުރިއަށްދާ މި ތަމްރީނު މޮޑިއުލްގައި މައިގަނޑު ގޮތެއްގައި އަލިއަޅުވާލާނީ ހެޔޮވެރިކަމާއި އިދާރީ ހިންގުން ހަރުދަނާކުރުމާ ގުޅޭގޮތުންނެވެ.
މި ޕްރޮގްރާމުގެ މަގްސަދަކީ ދިވެހި ސިވިލް ސާވިސްގެ މުވައްޒަފުންގެ ފަންނީ ގާބިލުކަން އިތުރުކޮށް، ސަރުކާރުގެ އިދާރާތަކުން ރައްޔިތުންނަށް ފޯރުކޮށްދޭ ހިދުމަތްތަކުގެ ފެންވަރު މަތިކުރުމެވެ.
މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ދިވެހި ސިވިލް ސާވިސްގެ މުވައްޒަފުންގެ ހުނަރާއި ގާބިލުކަން އިތުރުކުރުމަށް ކުރަމުންދާ މަސައްކަތްތަކުގެ ތެރެއިން، ދެ ގައުމުގެ ދެމެދުގައި އޮތް ގާތް ގުޅުމުގެ ދަށުން ކުރިއަށްގެންދާ މުހިންމު ދަތުރެކެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
