ދިވެހި ވަޠަނީ ޚިދުމަތުގެ 3 ވަނަ ބެޗުގެ ތަމްރީނުތައް 352 ޒުވާނުންނާއެކު ފަށައިފި
ދިވެހި ސަރުކާރުން ކުރިއަށްގެންދާ "ދިވެހި ވަޠަނީ ޚިދުމަތް" (ނޭޝަނަލް ސަރވިސް) ގެ ތަމްރީނުތަކުގެ ތިންވަނަ ބެޗުގައި ބައިވެރިވާ ފުރަތަމަ ގުރޫޕު ތަމްރީނުތަކަށް ފުރައިފިއެވެ.
މި ފަހަރުގެ ތަމްރީނުތަކުގައި ބައިވެރިވުމަށް ހުޅުވާލި ދެވަނަ ފުރުޞަތުގައި ޖުމްލަ 1,785 ޒުވާނުން ކުރިމަތިލާފައިވެއެވެ. އޭގެ ތެރެއިން މިހާރު ފުރާފައިވަނީ ފުރަތަމަ ހޮވުނު 352 ބައިވެރިންނެވެ. މި ބެޗުގައި ރާއްޖޭގެ 20 އަތޮޅުގެ 115 ރަށަކަށް ނިޞްބަތްވާ 64 އަންހެން ޒުވާނުންނާއި 288 ފިރިހެން ޒުވާނުން ހިމެނެއެވެ.
ތިން މަސްދުވަހުގެ މުއްދަތަށް ކުރިއަށްގެންދާ މި ތަމްރީނު ޕްރޮގްރާމް ބޭއްވުމަށް ހަމަޖެހިފައިވަނީ ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިންގ ސެންޓަރުގައެވެ.
މި ތަމްރީނުތަކުގެ މައިގަނޑު މަޤްޞަދަކީ އަމިއްލަ ނަފްސަށް އިތުބާރުކުރާ، އިސްލާމީ ޢަޤީދާ ވަރުގަދަ، އަދި ރޫޙާނީ އާއި ޖިސްމާނީ ގޮތުން ދުޅަހެޔޮ ޒުވާން ޖީލެއް ބިނާކުރުމެވެ. މިގޮތުން، މި ތަމްރީނުތަކުގެ ތެރޭގައި ދިވެހި ޤައުމިއްޔަތާއި، ޒިންމާދާރު ރައްޔިތަކަށް ވުމާއި، ދީނީ ތަރުބިއްޔަތާއި އަޚްލާޤުގެ އިތުރުން ލީޑަރޝިޕް އަދި ހަށިހެޔޮކަމުގެ ގިނަ ފިލާވަޅުތަކެއް އުނގަންވައިދެވޭނެއެވެ. މީގެ އިތުރުން ދިރިއުޅުމުގެ ޢަމަލީ މައިދާނުގައި ބޭނުންވާނެ ތަފާތު އެކި ދާއިރާތަކުންވެސް މި ޒުވާނުން ތަމްރީނު ކުރެވޭނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ޒުވާނުން ބިނާކުރުމުގެ ސިޔާސަތުގެ ދަށުން ކުރިއަށްގެންދާ މި ޙަރަކާތަކީ، ޤައުމަށް ލޯބިކުރާ ޒިންމާދާރު ޒުވާނުންތަކެއް އުފެއްދުމަށްޓަކައި ދެމެހެއްޓެނިވި ގޮތެއްގައި ކުރިއަށް ގެންދިއުމަށް ނިންމާފައިވާ އެންމެ މުހިންމު އެއް މަޝްރޫޢެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
