މާލޭގެ މަގުތަކުން ތަކުބީރުގެ އަޑު ކެނޑިއްޖެ؛ މިއީ އެމްޑީޕީއަށް ބާރު ލިބުމުން ކަންކަން ވާގޮތް - އަރީޝް
ވޭތުވެދިޔަ ފަސް އަހަރުގެ ތެރޭގައި، މާލޭގެ މަގުތަކުން ތަކުބީރުގެ މާތް އަޑު ކެނޑިގެންދިޔަ ފުރަތަމަ އީދަކީ މިއީ ކަމަށް ވިދާޅުވެ، މާލޭ ސިޓީ ކައުންސިލްގެ ކުރީގެ ޑެޕިއުޓީ މޭޔަރު އަޙްމަދު އަރީޝް ކަންބޮޑުވުން ފާޅުކުރައްވައިފިއެވެ.
އަރީޝް އެކްސްގައި ކުރެއްވި ޕޯސްޓެއްގައި ވިދާޅުވީ، މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭ ސިޓީގެ މޭޔަރުކަމުގެ މަޤާމުގައި ހުންނެވިއިރު، މުޅި ގްރޭޓަރ މާލެ ސަރަޙައްދުގެ އެކި ހިސާބުތަކުން އީދު ތަކުބީރުގެ އަޑު ގުގުމަމުންދިޔަ ކަމަށެވެ. އަދި ޕީ.އެން.ސީގެ އަޣުލަބިއްޔަތު އޮތް ކައުންސިލުން މެދުނުކެނޑި އެ އާދަ ހިފަހައްޓަމުން ގެންދިޔަކަން އޭނާ ފާހަގަކުރެއްވިއެވެ.
ނަމަވެސް، މިއަދުގެ އީދުގައި މާލެއިން ފެންނަމުންދަނީ މުޅިން ތަފާތު މަންޒަރެއްކަމަށާއި، މަގުތަކުން ތަކުބީރުގެ އަޑު ކެނޑި މުޅި މާޙައުލު ފަޅުވެފައިވާކަން އަރީޝް ފާހަގަކުރެއްވިއެވެ. އޭނާ ވިދާޅުވި ގޮތުގައި މިއީ އެމް.ޑީ.ޕީ އަށް ކިރިޔާވެސް ބާރެއް ލިބުމުން ކަންކަން ބަދަލުވެގެންދާ ގޮތެވެ.
މާލޭގެ މަގުތަކުގައި ލޯޑްސްޕީކަރު ބަހައްޓައިގެން ތަކުބީރު ފޮނުވުމަކީ ރައީސް ޑރ. މުޢިއްޒުގެ މޭޔަރުކަމުގައި ވަރަށް ބޮޑު އިސްކަމެއް ދީގެން ކުރިއަށް ގެންދިޔަ ހަރަކާތެކެވެ. ނަމަވެސް މިއަހަރުގެ އީދުގައި އެ އަޑު މާލޭގެ މަގުތަކުން ނީވޭތީ އާންމުންގެ ގިނަ ބަޔަކުވެސް ދަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
