އެޗްއާރުސީއެމްގެ ރިޕޯޓުގައި ހުރި ކަންކަން ރަނގަޅުކުރާނެ ކަމަށް ފުލުހުން ބުނެފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ޝާއިއުކޮށްފައިވާ "ނޭޝަނަލް ޕްރިވެންޓިވް މެކޭނިޒަމް" (އެންޕީއެމް) ގެ 2025 ވަނަ އަހަރުގެ އަހަރީ ރިޕޯޓާ ގުޅިގެން ބައެއް މީޑިއާތަކުން ހަބަރު ފެތުރި ގޮތާމެދު ދިވެހި ފުލުހުންގެ ހިދުމަތުން ކަންބޮޑުވުން ފާޅުކޮށްފިއެވެ.

ފުލުހުން ބުނީ މި ރިޕޯޓާ ގުޅޭގޮތުން ހަބަރު ގެނެސްދިނުމުގައި ބައެއް މީޑިއާތަކުން ބޭނުންކޮށްފައިވާ ބަސްމަގާއި، ރިޕޯޓުގެ މައުލޫމާތު މާނަކޮށްފައިވާ ގޮތާމެދު ސުވާލު އުފެދޭ ކަމަށެވެ.

މިކަމާ ގުޅިގެން ފުލުހުން ނެރުނު ބަޔާނެއްގައި ބުނެފައިވަނީ، ރިޕޯޓުގެ އަސްލު މަގްސަދާއި އޭގައި ބަޔާންކޮށްފައިވާ ކަންކަމުގެ ފުންމިނަށް ބެލުމެއް ނެތި ބައެއް މީޑިއާތަކުން ހަބަރު ފަތުރާފައިވާ ކަމަށެވެ. ވަކިން ހާއްސަކޮށް، މުއައްސަސާތަކަށް ކުރިމަތިވެފައިވާ ވަސީލަތްތަކުގެ ދަތިކަމާއި އޮޕަރޭޝަނަލް ގޮންޖެހުންތަކަށް ރިއާޔަތްނުކޮށް ހަބަރު ފަތުރާފައިވާކަން ފުލުހުން ފާހަގަކުރިއެވެ. އާންމުންނަށް ސައްހަ މައުލޫމާތު ފޯރުކޮށްދިނުމުގައި ކަންކަމުގެ އަސްލަށް ވާސިލުވެ، ޒިންމާދާރުކަމާއެކު ހަބަރު ފެތުރުމަކީ ނުހަނު ބޭނުންތެރި ކަމެއް ކަމަށްވެސް ފުލުހުން ބުނެފައިވެއެވެ.

އެޗްއާރްސީއެމްގެ ރިޕޯޓުގައި ފާހަގަކޮށްފައިވާ ކަންކަމަކީ މުޅި ނިޒާމަށް އަމާޒުކޮށްފައިވާ ކަންކަން ކަމަށާއި، އެއީ ހަމައެކަނި ވަކި މުއައްސަސާއަކަށް ދިމާވެފައިވާ ގޮންޖެހުންތަކެއް ނޫންކަން ފުލުހުން ފާހަގަކުރެއެވެ. އަދި އެ ރިޕޯޓުގައި ހިމެނޭ ހޯދުންތަކަކީ ކަންކަން އިސްލާހުކުރުމަށް ދީފައިވާ އިރުޝާދުތަކަކާއި ލަފާތަކެއް ކަމަށާއި، އެއީ ގާނޫނީ ގޮތުން ކުށެއް ނުވަތަ ނުރަނގަޅު އަމަލެއް ހިންގާފައިވާކަން ކަނޑައަޅާ ނިންމުންތަކެއް ނޫންކަންވެސް ފުލުހުން ވަނީ ސާފުކޮށްދީފައެވެ.

މިނިވަން މުއައްސަސާތަކުން އިންސާނީ ހައްގުތައް ހިމާޔަތްކުރުމަށާއި، ދެފުށް ފެންނަ ގޮތަށް ކަންކަން ހިންގުމަށް ކުރާ މަސައްކަތްތައް ބަލައިގަންނަ ކަމަށް ފުލުހުން ބުނެއެވެ. ވަކިން ހާއްސަކޮށް "އޮޕްޝަނަލް ޕްރޮޓޮކޯލް ޓު ދަ ކޮންވެންޝަން އެގެއިންސްޓް ޓޯޗަރ އެންޑް ދަ ކްރުއަލް، އިންހިއުމަން އޯ ޑިގްރޭޑިންގ ޓްރީޓްމަންޓް އޯ ޕަނިޝްމަންޓް" (އޮޕްޓެކް) ގެ ދަށުން ކުރިއަށްގެންދާ މޮނިޓަރިންގ މަސައްކަތްތަކަކީ ގައުމީ ފެންވަރުގައި މިކަމަށް ދެވިފައިވާ މުހިންމު އަހަންމިއްޔަތުކަން ހާމަވާ ކަމެއް ކަމަށް ފުލުހުން ދެކެއެވެ.

ފުލުހުންގެ ހިދުމަތުން އިތުރަށް ބުނީ، ރިޕޯޓުގައި ފާހަގަކޮށްފައިވާ ކަންކަން އިސްލާހުކޮށް ހިދުމަތުގެ ފެންވަރު މަތިކުރުމަށްޓަކައި އެޗްއާރްސީއެމް އާއި ކަމާބެހޭ އެހެނިހެން ފަރާތްތަކާ ގުޅިގެން މަސައްކަތްކުރުމުގައި ދެމިއޮންނާނެ ކަމަށެވެ. އަދި ފުލުހުންގެ މަސައްކަތްތައް ގާނޫނުތަކާއި ބައިނަލްއަގުވާމީ މިންގަނޑުތަކަށް ފެއްތުމަށް ކުރަންޖެހޭ އެންމެހައި މަސައްކަތްތައް މެދުނުކެނޑި ކުރިއަށް ގެންދާނެ ކަމުގެ ޔަގީންކަންވެސް އެ މުއައްސަސާއިން ވަނީ އަރުވާފައެވެ.