ގައުމީ ޚިދުމަތްތެރިޔާ އަބްދުﷲ ޖަލީލް އަވަހާރަވުމާ ގުޅިގެން ރައީސް ތައުޒިޔާ ފޮނުއްވައިފި

ދިވެހި ދައުލަތަށް 46 އަހަރަށްވުރެ ގިނަ ދުވަހު އިޚްލާޞްތެރި ޚިދުމަތްތަކެއް ކުރެއްވި ނޫރަންވިލާ އަބްދުﷲ ޖަލީލް އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވަނީ މަރުހޫމް އަބްދުﷲ ޖަލީލަކީ ދިވެހި ޤައުމަށް ނުހަނު އަގުހުރި ޚިދުމަތްތަކެއް ކޮށްދެއްވާފައިވާ، ދައުލަތުގެ ނަމޫނާ ޚިދުމަތްތެރިއެއްގެ ގޮތުގައި ސިފަކުރައްވާފައެވެ. އަބްދުﷲ ޖަލީލު، ހއ. ތުރާކުނު ކުޑަކަތީބުކަމާއި ކަތީބުކަންވެސް ކުރައްވާފައިވާކަން ފާހަގަކުރައްވާ ރައީސް ވިދާޅުވީ އޭނާގެ ވަކިވެދިއުމަކީ ގައުމަށް ލިބުނު ފޫނުބެއްދޭނެ އުނިކަމެއްކަމަށެވެ.

މި ހިތާމަވެރި ވަގުތުގައި، މަރުހޫމް އަބްދުﷲ ޖަލީލުގެ އާއިލާއަށާއި ގާތްތިމާގެ ބޭފުޅުންނަށް ރައީސުލްޖުމްހޫރިއްޔާ ވަނީ އިޚްލާޞްތެރި ތައުޒިޔާ ފޮނުއްވާފައެވެ. އަދި މަރުހޫމަށް ސުވަރުގޭގެ ދާއިމީ ނިއުމަތް މިންވަރުކޮށްދެއްވައި، އާއިލާއަށް ކެތްތެރިކަން ދެއްވުން އެދި އެމަނިކުފާނު ވަނީ ދުޢާ ކުރައްވާފައެވެ.

އަބްދުﷲ ޖަލީލަކީ ސަރުކާރުގެ އެކި ދާއިރާތަކުގައި ގިނަގުނަ މަސައްކަތްތަކެއް ކުރައްވައި، ދައުލަތުގެ އިސް މަގާމުތަކެއް ފުރުއްވާފައިވާ ބޭފުޅެކެވެ.