ކޮރަޕްޝަން ހުއްޓުވުމުގައި އެންމެ ބޮޑު ދައުރެއް އަދާކުރެވޭނީ ސިވިލް ސާވަންޓުންނަށް: މިނިސްޓަރު ޑރ. އިސްމާޢީލް ޝަފީޢު

ދައުލަތުގެ އިދާރާތަކުން ކޮރަޕްޝަން ނައްތާލައި، ނަޒާހަތްތެރިކަން ގާއިމުކުރުމުގައި އެންމެ އިސް ދައުރެއް އަދާކުރެވޭނީ ސިވިލް ސާވަންޓުންނަށް ކަމަށް މިނިސްޓަރ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓް ޑރ. އިސްމާޢީލް ޝަފީޢު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ މިއަދު ހެނދުނު ފެށުނު "މޯލްޑިވްސް ސިވިލް ސަރވިސް ކޮންފަރެންސް" އިފްތިތާހުކޮށްދެއްވައި ވާހަކަފުޅު ދައްކަވަމުންނެވެ. މި ކޮންފަރެންސްގައި ސިވިލް ސާވަންޓުން ހިފަހައްޓަންޖެހޭ މަސައްކަތުގެ އަޚުލާގާއި ގައުމީ ޒިންމާގެ މައްޗަށް މިނިސްޓަރު އަލިއަޅުއްވާލެއްވިއެވެ.

މިނިސްޓަރު ޝަފީޢު ވިދާޅުވީ، ގައުމުގެ ސިޔާސީ އޮއިވަރަށް އަންނަ ބަދަލުތަކާއެކުވެސް، މެދުކެނޑުމެއް ނެތްގޮތެއްގައި ރައްޔިތުންނަށް ޚިދުމަތް ފޯރުކޮށްދިނުމުގައި ދެމިއޮންނަ މައިބަދައަކީ ސިވިލް ސަރވިސް ކަމަށެވެ. އަދި ބޮޑެތި މާލީ ޚިޔާނާތްތަކަށް މަގުފަހިވަނީ އިދާރީ ކޮރަޕްޝަންގެ ސަބަބުން ކަމަށާއި، އިދާރީ އޮނިގަނޑު ހަރުދަނާކޮށްގެން ދައުލަތުގެ ފައިސާއަށް ޚިޔާނާތްތެރިވުމުގެ ހުރިހާ ދޮރުތަކެއް ބަންދުކުރެވޭނެ ކަމަށް އެމަނިކުފާނު ފާހަގަކުރެއްވިއެވެ.

"ދިވެހިރާއްޖެއަކީ ކޮރަޕްޝަނުން ސަލާމަތްވެފައިވާ ގައުމަކަށް ހެދުމަށް އެންމެ ބޮޑު އެއްބާރުލުމެއް ދެވޭނީ ސިވިލް ސާވަންޓުންނަށް. އިދާރީ ކޮރަޕްޝަން ނައްތާލައި، ހަލުވިކަމާއެކު ފަންނީ މަސައްކަތްތަކެއް ދައްކައިދީގެން، ރައްޔިތުންގެ ޓެކްސް ފައިސާގެ ރައްކާތެރިކަން ކަށަވަރުކޮށްދޭ ފަދަ ޚިދުމަތެއް އަޅުގަނޑުމެންނަށް ދެވޭނެ،" މިނިސްޓަރު ވިދާޅުވިއެވެ.

މިނިސްޓަރު އިތުރަށް ފާހަގަކުރެއްވި ގޮތުގައި ރާއްޖޭގެ ކޮންމެ ފަސް މީހަކުން އެކަކީ ސިވިލް ސާވަންޓެކެވެ. މިހާރު ސިވިލް ސަރވިސްގައި 35،000 އެއްހާ މުވައްޒަފުން ތިބިއިރު، އޭގެ ތެރޭގައި 32،400 ދާއިމީ މުވައްޒަފުން ހިމެނެއެވެ. މިއީ ދައުލަތުގެ ބަޖެޓުން ބޮޑު ހޭދައެއް ކުރާ ދާއިރާއަކަށް ވާއިރު، އިދާރީ މަސައްކަތްތައް ލަސްވުމަކީ ރައްޔިތުންގެ އިތުބާރު ގެއްލޭ ކަމެއް ކަމަށްވެސް އެމަނިކުފާނު ވިދާޅުވިއެވެ.

މިނިސްޓަރު ވިދާޅުވީ ކޮރަޕްޝަން ނައްތާލުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 'މޯލްޑިވްސް 2.0' ތަޞައްވުރުގެ ދަށުން ރައްޔިތުންނަށް އިސްކަންދޭ ނިޒާމެއް ގާއިމުކުރުމަށް ކުރެވޭ މުހިންމު މަސައްކަތެއް ކަމަށެވެ.

މި ރަސްމިއްޔާތުގައި ސިވިލް ސަރވިސް ކޮމިޝަންގެ ރައީސް މުޙައްމަދު މުޖުތާޒު ވިދާޅުވީ، 'މޯލްޑިވްސް 2.0' ގެ ސަބަބުން ދައުލަތުގެ ޚިދުމަތްތަކަށް ބޮޑު ބަދަލެއް އަންނާނެ ކަމަށެވެ. އަދި 2009 ވަނަ އަހަރަށްފަހު މުސާރައިގެ ކުރިއެރުމެއް ނުލިބި ތިބި މުވައްޒަފުންނަށް މިދިޔަ ނޮވެމްބަރު މަހު މުސާރައިގެ ކުރިއެރުން ދީފައިވާކަން އޭނާ ފާހަގަކުރެއްވިއެވެ.

މިއީ 2014 ވަނަ އަހަރުން ފެށިގެން ކޮންމެ ދެ އަހަރުން އެއް އަހަރު ބާއްވަމުން އަންނަ ކޮންފަރެންސްގެ ފަސްވަނަ ބައްދަލުވުމެވެ. މި އަހަރުގެ ކޮންފަރެންސްގައި ކައުންސިލްތަކާއި، ސްކޫލްތަކާއި، ހޮސްޕިޓަލްތަކުން ގާތްގަނޑަކަށް 300 މަންދޫބުން ބައިވެރިވެ، އަށް ދާއިރާއަކުން 18 ދިރާސާ ކަރުދާސް ހުށަހެޅުމަށް ވަނީ ހަމަޖެހިފައެވެ.