މިއަހަރުގެ ޙައްޖު މޫސުން ކާމިޔާބުކަމާއެކު ނިންމާލުމާ ގުޅިގެން، ރައީސް މުޢިއްޒަށާއި ސައުދީ ސަރުކާރަށް އިސްލާމިކް މިނިސްޓަރު ޝުކުރު އަދާކުރައްވައިފި

މިއަހަރުގެ ބަރަކާތްތެރި ޙައްޖު މޫސުން ކާމިޔާބުކަމާއެކު ނިމިގެންދިޔުމާ ގުޅިގެން، ރާއްޖޭގެ ޙައްޖުވެރިންގެ ކަންކަން އިންތިޒާމުކުރުމުގައި ބައިވެރިވި ހުރިހާ ފަރާތްތަކަށާއި، ސައުދީ ސަރުކާރަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ޝުކުރު އަދާކުރައްވައިފިއެވެ.

މިނިސްޓަރު ޝަހީމް މިއަދު އެކްސް ގައި ކުރެއްވި ޕޯސްޓެއްގައި ވިދާޅުވީ، މިއަހަރުގެ ޙައްޖު މޫސުން ކާމިޔާބުކަމާއެކު ނިމިގެންދިޔައީ މާތްﷲގެ ތައުފީޤާއި، ދިވެހި ސަރުކާރާއި ސައުދީ ސަރުކާރުގެ ވަރަށް ބޮޑު އެހީތެރިކަމަކާއެކު ކަމަށެވެ. ޚާއްޞަގޮތެއްގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޙައްޖުވެރިންގެ ކަންކަމަށް ދެއްވި ޚާއްޞަ ސަމާލުކަމާއި، އިސްލާމީ ކަންތައްތަކާ ބެހޭ ދާއިރާއަށް ދެއްވަމުން ގެންދަވާ މެދުނުކެނޑޭ އެހީތެރިކަމަށްޓަކައި މިނިސްޓަރު ވަނީ ރައީސަށް އިޚްލާޞްތެރިކަމާއެކު ޝުކުރު ދަންނަވާފައެވެ.

މިނިސްޓަރުގެ ޕޯސްޓުގައި ފާހަގަކުރައްވާފައިވާ ގޮތުގައި، ދިވެހި ޙައްޖުވެރިންނަށް ފަސޭހަކަމާއެކު އަޅުކަން އަދާކުރެވޭނެ އިންތިޒާމުތައް ހަމަޖެއްސުމުގައި މޯލްޑިވްސް ޙައްޖު ކޯޕަރޭޝަނުން ކުރި މަސައްކަތްތަކީ ތައުރީފު ޙައްޤު މަސައްކަތްތަކެކެވެ. އެގޮތުން އެ ކޯޕަރޭޝަންގެ މެނޭޖިންގ ޑިރެކްޓަރު މުޙައްމަދު ޝަހީލްއާއި، ހުރިހާ މުވައްޒަފުންނާއި، ވޮލަންޓިއަރުންގެ އިތުރުން ސިއްޙީ ޚިދުމަތްތެރިން ކުރެއްވި ބުރަ މަސައްކަތް މިނިސްޓަރު ފާހަގަކުރެއްވިއެވެ.

މީގެ އިތުރުން، ސައުދީ ސަރުކާރުން މިއަހަރު ރާއްޖެއަށް ދެއްވި "މައްކާ ރޯޑް އިނީޝިއޭޓިވް" ގެ ޚިދުމަތަކީ ދިވެހި ޙައްޖުވެރިންނަށް ލިބުނު ވަރަށް ބޮޑު ލުޔެއްކަމަށް މިނިސްޓަރު ވިދާޅުވިއެވެ. މި ޚިދުމަތުގެ ސަބަބުން ޙައްޖުވެރިންގެ ދަތުރުފަތުރުގެ ކަންކަން އިތުރަށް ހަރުދަނާވެގެން ދިޔަކަން ފާހަގަކުރައްވަމުން، ޚާދިމުލް ޙަރަމައިނިއްޝަރީފައިނި، ސައުދީ ރަސްގެފާނު ސަލްމާން ބިން ޢަބްދުލްޢަޒީޒް އާލް ސުޢޫދަށާއި، ވަލީޢަހުދު މުޙައްމަދު ބިން ސަލްމާނަށް މިނިސްޓަރު ޝުކުރު އަދާކުރެއްވިއެވެ.

އިސްލާމިކް މިނިސްޓްރީގެ ޙައްޖާއި ޢުމްރާ ޑިޕާޓްމަންޓުގެ މުވައްޒަފުންނާއި، މައްކާގައި ޙަރަކާތްތެރިވި ޙައްޖު މިޝަންގެ މެންބަރުން ކުރެއްވި އިޚްލާޞްތެރި މަސައްކަތްތަކަށްވެސް މިނިސްޓަރު ވަނީ ތައުރީފު ކުރައްވާފައެވެ.

މިނިސްޓަރު ޝަހީމް އިތުރަށް ވިދާޅުވީ، ކުރިއަށް އޮތް ތަނުގައިވެސް ޙައްޖާއި ޢުމްރާގެ ނިޒާމު އިތުރަށް ތަރައްޤީކޮށް، ދިވެހި ރައްޔިތުންނަށް މިހާރަށްވުރެ ފެންވަރު ރަނގަޅު އަދި ލުއިފަސޭހަ ޚިދުމަތްތަކެއް ފޯރުކޮށްދިނުމަށް މިނިސްޓްރީން މެދުނުކެނޑި މަސައްކަތް ކުރަމުންދާނެ ކަމަށެވެ. އަދި ﷲގެ މެހުމާނުންނަށް ޚިދުމަތް ކުރުމަކީ ލިބޭ ވަރަށް ބޮޑު ޝަރަފެއްކަމުގައިވެސް މިނިސްޓަރު ވިދާޅުވިއެވެ.