މެލޭޝިއާގެ ދެ ޔުނިވަރސިޓީއަކަށް ބޮމުގެ އިންޒާރުދީ، ކެމްޕަސްތައް ހުސްކޮށްފި

މެލޭޝިއާގެ އެންމެ ކުރިއަރާފައިވާ ދެ ޔުނިވަރސިޓީއަކަށް ބޮމުގެ އިންޒާރު ލިބުމާ ގުޅިގެން، އެ ތަންތަނުގެ ސަލާމަތީ ކަންކަން ވަރުގަދަކޮށް ކެމްޕަސްތައް ވަގުތުން ހުސްކޮށްފިއެވެ. މި ހާދިސާތަކާ ގުޅިގެން އެ ތަންތަނުގައި ކިޔަވަމުންދާ އެތައް ހާސް ދަރިވަރުންނެއްގެ މެދުގައި ބިރުވެރިކަން އުފެދިފައިވާއިރު، މީގެ ތެރޭގައި ގިނަ ޢަދަދެއްގެ ދިވެހި ދަރިވަރުން ވެސް ހިމެނެއެވެ.

އިއްޔެ މޮނާޝް ޔުނިވަރސިޓީ މެލޭޝިއާގެ ސަންވޭ ސިޓީ ކެމްޕަހަށް ބޮމުގެ އިންޒާރެއް ލިބުމާ ގުޅިގެން، އެ ޔުނިވަރސިޓީން ވަނީ ވަގުތުން ސަލާމަތީ ފިޔަވަޅުތައް އަޅައި ކެމްޕަސް ހުސްކޮށްފައެވެ. ފުލުހުންނާއި ސަލާމަތީ ބާރުތަކުން ގުޅިގެން އެ ސަރަހައްދު ބަލައި ފާސްކުރުމަށްފަހު، އެއްވެސް ނުރައްކާތެރި އެއްޗެއް ފެނިފައި ނުވާތީ، މިއަދު އެ ކެމްޕަހުގެ ކިޔެވުން ވަނީ އަލުން ފަށާފައެވެ.

ނަމަވެސް، ޖޮހޯ ބާރޫގައި ހުންނަ އެ ޔުނިވަރސިޓީގެ ކްލިނިކަލް ސްކޫލް (ސީއެސްޖޭބީ) އަދިވެސް އޮތީ ބަންދުކޮށްފައެވެ. އެ ތަނުގެ ސަލާމަތީ ކަންކަން އިތުރަށް ބަލަމުންދާތީ، ވަކި ގޮތެއް އަންގަންދެން އެ ކެމްޕަސް ބަންދުވާނެ ކަމަށް ޔުނިވަރސިޓީން ބުނެފައިވެއެވެ.

މޮނާޝް ޔުނިވަރސިޓީއަށް އިންޒާރު ލިބުނުތާ 24 ގަޑިއިރު ވެސް ނުވަނީސް، ސުބަންގް ޖަޔާގައި ހުންނަ ޓޭލާސް ޔުނިވަރސިޓީއަށް ވެސް ވަނީ ބޮމުގެ އިންޒާރު ލިބިފައެވެ. އެ ހިނދުން ހިނދަށް ކެމްޕަހުގައި ތިބި ދަރިވަރުންނާއި މުވައްޒަފުން ބޭރުކޮށް، ފުލުހުން ވަނީ އެ ސަރަހައްދުގައި ތަހުގީގު ހިންގަން ފަށާފައެވެ.

މި ދެ ޔުނިވަރސިޓީއަކީ ވެސް ދިވެހި ދަރިވަރުންގެ މެދުގައި ވަރަށް މަގުބޫލު ދެ ތަނެވެ. މެޑިސިން، އިންޖިނިއަރިންގ، ބިޒްނަސް، ލޯ އަދި އައިޓީ ފަދަ އެކި ދާއިރާތަކުން ފުރަތަމަ ޑިގްރީ އާއި މާސްޓާސްއަށް ކިޔަވަމުންދާ ގިނަ އަދަދެއްގެ ދިވެހި ކުދިން މި ދެ ކެމްޕަހުގައި ވެސް އުޅެއެވެ. އެހެންކަމުން، މި ހާދިސާތަކާ ގުޅިގެން މެލޭޝިއާގައި ތިބި ދިވެހި ދަރިވަރުންނާއި ރާއްޖޭގައި ތިބި އެ ކުދިންގެ އާއިލާތަކުން ވަނީ ބޮޑު ކަންބޮޑުވުމެއް ފާޅުކޮށްފައެވެ.

މެލޭޝިއާ ފުލުހުން ބުނެފައިވަނީ، މި ދެ އިންޒާރަކީ އެކަކު ނުވަތަ އެއް ބަޔަކު ދީފައިވާ އިންޒާރުތަކެއް ކަމެއް ނުވަތަ ނޫންކަމެއް އަދި ކަށަވަރު ނުވާ ކަމަށެވެ. އަދި މިހާތަނަށް އެއްވެސް ކެމްޕަހަކުން ގޮވާ އެއްޗެއް ފެނިފައި ނުވާ ކަމަށް ވެސް ފުލުހުން ބުނެއެވެ.

ޔުނިވަރސިޓީތަކުން ބުނެފައިވަނީ ދަރިވަރުންނާއި މުވައްޒަފުންގެ ސަލާމަތާއި ރައްކާތެރިކަމަކީ އެންމެ އިސްކަންދޭނެ ކަންތައް ކަމަށާއި، މިކަމުގައި ސަލާމަތީ އިދާރާތަކާ ގުޅިގެން މަސައްކަތް ކުރަމުންދާނެ ކަމަށެވެ. މި ހާދިސާތަކާ ގުޅިގެން މެލޭޝިއާގެ ކެމްޕަސްތަކުގެ ސަލާމަތީ ކަންކަން މިހާރު ވަނީ ކުރިއަށްވުރެ ވަރުގަދަކޮށްފައެވެ.