ރައްޔިތުންގެ މަޖިލީހުގެ ނައިބު ރައީސްކަމުން އަޙްމަދު ނާޒިމް އިސްތިއުފާ ދެއްވައިފި

ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަޙްމަދު ނާޒިމް މިއަދު އެ މަޤާމުން އިސްތިއުފާ ދެއްވައިފިއެވެ. ނާޒިމް އިސްތިއުފާ ދެއްވާފައިވަނީ އޭނާ މަޤާމުން ވަކިކުރުމުގެ މައްސަލަ މިއަދުގެ ޖަލްސާއަށް އެޖެންޑާކޮށްފައި ވަނިކޮށެވެ.

ނާޒިމް މަޤާމުން އިސްތިއުފާ ދެއްވިކަން ހާމަކުރައްވާފައިވަނީ އެކްސް މެދުވެރިކޮށް އާންމުކުރެއްވި ބަޔާނެއްގައެވެ. އެ ބަޔާނުގައި ނާޒިމް ވަނީ އޭނާ މަޤާމުން ވަކިކުރުމަށް ހުށަހަޅާފައިވާ ޤަރާރުގައިވާ ތުހުމަތުތަކަށް އެއްވެސް އުނި އިތުރެއް ނެތި އިންކާރު ކުރައްވާފައެވެ.

އޭނާ ފާހަގަކުރެއްވި ގޮތުގައި މަޤާމުން ވަކިކުރުމަށް ހުށަހެޅި ޤަރާރުގައި އެއްވެސް ހެއްކެއް ނުވަތަ ޤަރީނާއެއް ބަޔާންކޮށްފައެއް ނުވެއެވެ. އަދި މިހާތަނަށް މަޖިލީހުގެ ނައިބު ރައީސްގެ ހައިސިއްޔަތުން ނުވަތަ މެންބަރެއްގެ ހައިސިއްޔަތުންވެސް ޤާނޫނުއަސާސީއާ ނުވަތަ މަޖިލީހުގެ ޤަވާއިދާ ޚިލާފުވެފައިވާ ކަމުގެ އެއްވެސް ޝަކުވާއެއް އެއްވެސް ފަރާތަކުން ހުށަހަޅާފައި ނުވާތީ، އެ ތުހުމަތުތަކަކީ އެއްވެސް އަސާސެއް ނެތް ކަންތައްތަކެއް ކަމަށް އޭނާ ވިދާޅުވިއެވެ.

"ރައްޔިތުންގެ މަޖިލީހުގެ ނައިބު ރައީސްކަމުގެ މަޤާމުގެ ވާޖިބުތަކާއި ޒިންމާތައް އަޅުގަނޑު އަދާކޮށްފައިވާނީ ޤާނޫނީ ހަމަތަކުގެ މަތިން ތެދުވެރިކަމާއި އަމާނާތްތެރިކަމާއެކު،" ނާޒިމްގެ ބަޔާނުގައި ވިދާޅުވެފައިވެއެވެ.

އޭނާ އިތުރަށް ވިދާޅުވީ، މަޤާމުގެ ޒިންމާތަކުން ބަރީއަވެ ފަސްޖެހިފައި ނުވާނެ ކަމަށާއި، ވަކި ސިޔާސީ ފިކުރަކަށް ތަބާވެ ޤާނޫނާ ޚިލާފު އެއްވެސް ކަމެއް ކޮށްފައި ނުވާނެ ކަމަށެވެ. އަދި މަޤާމުގެ ނުފޫޒު ބޭނުންކޮށްގެން ނާޖާއިޒް ފައިދާއެއް ނަގާފައި ނުވާނެ ކަމުގެ ޔަޤީންކަންވެސް އޭނާ ދެއްވިއެވެ.

އިސްތިއުފާ ދެއްވި ސަބަބާ ގުޅޭގޮތުން ނާޒިމް ވިދާޅުވީ، އޭނާ މަޤާމުން ވަކިކުރުމަށް ވެރިކަން ކުރާ ޕާޓީގެ ޕާލަމެންޓަރީ ގްރޫޕުގެ ހުރިހާ މެންބަރުން ސޮއިކުރައްވައި ހުށަހަޅުއްވާފައިވާތީ، އިންތިޚާބީ މަޤާމަކަށް ވޯޓުލީ އެންމެން އެ މީހަކު މަޤާމުން ދުރުވުމަށް އެދުމުން އެކަމަށް އިޖާބަ ދިނުމަކީ ޑިމޮކްރަސީގެ ހަމަތަކުގެ މަތިން ތަހުޒީބީ ގޮތެއް ކަމަށް ދެކޭތީ ކަމަށެވެ.

ބަޔާން ނިންމަވާލައްވަމުން ނާޒިމް ވިދާޅުވީ، މަޤާމުން އިސްތިއުފާ ދެއްވި ނަމަވެސް، ރައްޔިތުންގެ ޚާދިމެއްގެ ގޮތުގައި ޤާނޫނުގެ ވެރިކަން ނަގަހައްޓައި ރައްޔިތުންނަށް އުފާވެރި ދިރިއުޅުމެއް ހޯދައިދިނުމުގައި އަބަދުވެސް ދެމިހުންނާނެ ކަމަށެވެ.

މިއަދުގެ ޖަލްސާގައި މި މައްސަލަ ކުރިއަށް ގެންދަން ނިންމާފައިވަނީ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲގެ ރިޔާސަތުގައެވެ. ނާޒިމްގެ އިސްތިއުފާއާއެކު، މަޖިލީހުގެ ނައިބު ރައީސްގެ މަޤާމަށް އައު ބޭފުޅަކު އައްޔަންކުރުމުގެ މަސައްކަތް ކުރިއަށް އޮތް ތަނުގައި ކުރިއަށްދާނެއެވެ.