އިމިގްރޭޝަން ވޮޗްއަށް މިހާތަނަށް 290 މައްސަލަ ރިޕޯޓް ކޮށްފި

އިމިގްރޭޝަނާ ގުޅުންހުރި މައްސަލަ ރިޕޯޓްކުރުމަށް ޚާއްސަ އޮންލައިން ޕޯޓަލް އިމިގްރޭޝަން ވޮޗްއަށް މިހާތަނަށް 290 މައްސަލައެއް ރިޕޯޓް ކޮށްފައިވާކަން އިމިގްރޭޝަނުން ހާމަކޮށްފިއެވެ.

މީގެތެރެއިން 139 މައްސަލައެއް އިމިގްރޭޝަނުން ތަހުގީގުކުރަމުން އަންނައިރު، އިމިގްރޭޝަނުން އަންނަނީ 146 މައްސަލައިގެ މައުލޫމާތު ސައްހަކަން ކަށަވަރުކުރުމުގެ މަސައްކަތް ކުރަމުންނެވެ.

ހަމަ އެއާއެކު ރިޕޯޓް ކޮށްފައިވާ މައްސަލަތަކުގެ ތެރެއިން 5 މައްސަލައެއް އެއީ ކަމާ ގުޅުން ނެތް މައްސަލަތައްކަންވެސް އިމިގްރޭޝަނުން މައުލޫމާތުދެއެވެ.

މިދިޔަ މަހުގެ 17 ވަނަ ދުވަހު ހުޅުވާލި މި ޕްލެޓްފޯމުން ކޮންމެ ފަރާތަަކަށްވެސް ގަވާއިދާ ޚިލާފަށް އުޅޭ ބިދޭސީއެއްގެ މައްސަލަ ރިޕޯޓް ކުރެވިދާނެއެވެ. ނޫނީ ރާއްޖެއަށް ވަގަށް އެތެރެވާން މަސައްކަތް ކުރާ ބިދޭސީއެއްގެ މައުލޫމާތުވެސް ހިއްސާ ކުރެވިދާނެއެވެ.

މީގެއިތުރުން އަމިއްލަ އައިޑެންޓިޓީ ހާމަނުކޮށް، އެނޮނިމަސް ކޮށްވެސް 24 ގަޑީއިރު ރިޕޯޓް ކުރުމުގެ ފުރުސަތު އޮންނައިރު، މައުލޫމާތާ ފޮޓޯވެސް މި ޕްލެޓްފޯމް މެދުވެރިކޮށް ހުށަހެޅޭނެއެވެ.

އިމިގްރޭޝަނުން ވަނީ ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތަށް ރައްޔިތުން ދެއްވާ އެއްބާރުލުމަށް ޝުކުރުއަދާކޮށްފައެވެ. އަދި އެއިދާރާއަށް ރިޕޯޓް ކުރުމަށް ކަނޑައެޅިފައިވާ އިމިގްރޭޝަން ވޮޗް ނިޒާމުގެ ތެރެއިން ޤަވާދައިދާއި ޚިލާފަށް އުޅެމުންދާ ބިދޭސީންގެ މައްސަލަތައް ރިޕޯޓް ކުރަމުން ދިއުމަށް ވަނީ އެދިފައެވެ.

އިމިގްރޭޝަނުން ވަނީ ދާދިފަހުންވެސް ސާފުތާހިރުކަން ކުޑަކޮށް، ކާބޯތަކެތި ތައްޔާރުކުރަމުން ދިޔަ ތަނެއް ހުޅުމާލޭގައި ބަލާފާސްކޮށްފައެވެ. އެ މައްސަލާގައި 2 ބިދޭސީން އިމިގްރޭޝަންގެ ބެލުމުގެ ދަށަށް ގެންދިޔައިރު، އިމިގްރޭޝަނުން ވަނީ ސާފުތާހިރުކަމުގެ މިންގަނޑާއި އިޖްތިމާޢީ މިންގަޑަށް ތަން ނުފެތުމުން ކަމާބެހޭ އިދާރާތަކަށް އެކަން އަނގާފައެވެ.