ހއ. ހޯރަފުށީ ދާއިރާގެ މެންބަރ ޢަލީ މޫސާއާއި ވަޒީރު އާދަމް ޝަރީފް ބައްދަލުކުރައްވައިފި

ލޯކަލް ސިޓީސް މިނިސްޓަރު އާދަމް ޝަރީފް އުމަރު ހއ. ހޯރަފުށީ ދާއިރާގެ މެންބަރ ޢަލީ މޫސާއާއި ބައްދަލުކުރައްވައިފިއެވެ. 

މި ބައްދަލުވުމުގައި ޢަލީ މޫސާގެ އިތުރުން ހޯރަފުށީ ކައުންސިލުގެ ރައީސާއި، ކައުންސިލުގެ އިތުރު 2 މެންބަރަކު ބައިވެރިވެފައިވެއެވެ. 

މިއަދު ބޭއްވި މި ބައްދަލުވުމުގައި ރަށުގެ ގިނަ ކަންކަމާއި މަޝްވަރާ ކުރައްވާފައިވެއެވެ، އެގޮތުން  ކައުންސިލުގެ އައު ޢިމާރާތުގެ މަސައްކަތް ލަސްވަމުން އަންނަ މައްސަލައާއި، ކައުންސިލު އިޚްތިޞާޞްގެ ތެރޭގައި ހިމެނޭ އިނގުރުފިނޮޅު ޓުއަރިޒަމަށް ހުޅުވާލުމުގެ ހުއްދަ އަދި މީގެ އިތުރުން ޓުއަރިޒަމް މިނިސްޓްރީން ހަމަނުޖެހި ލަސްވަމުންދާ މައްސަލަ ހިއްސާކުރެއްވާފައިވެއެވެ.

މީގެ އިތުރުން ކައުންސިލުތައް މިންކުރާ ޕަރފޯރމަންސް އިންޑެކްސްއަށް ގެންނަން ޖެހޭ ބައެއް ބަދަލުތައް ހުރިކަން އެ ބޭފުޅުން ފާހަގަކުރައްވާފައިވެއެވެ. މި ބައްދަލުވުމުގައި ވަޒީރު ވަނީ، އެ ބޭފުޅުންގެ ހުރި ކަންބޮޑުވުންތައް ޙައްލުކޮށް ދެއްވުމަށް ކަމާ ގުޅުން ހުރި މުއައްސަސާތަކާއެކު މަޝްވަރާކުރައްވާނެ ކަމުގެ ޔަޤީންކަން ދެއްވާފައެވެ.