ފައިސާ ދެއްކުމުގައި ދިމާވާ މައްސަލަ ހައްލު ކުރުމަށް ޕޭޕަލް އާއި އެކު ބޮޑެތި މަޝްވަރާތަކެއް

ޕޭޕަލް މެދުވެރިކޮށް ފައިސާ ލިބުމާ ގުޅޭގޮތުން ރާއްޖޭގައި އީ-ކޮމާސްއަށް ދިމާވާ ގޮންޖެހުންތައް ހައްލުކުރުމަށްޓަކައި ޕޭޕަލްގެ ޕްރެޒިޑެންޓް ފޯ ގްލޯބަލް މާކެޓިންގއާ އެކު މުހިންމު މަޝްވަރާއެއް ވަޒީރު ސައީދު ކުރައްވައިފިއެވެ. މި ބައްދަލުވުމަކީ މި ޕްލެޓްފޯމް މެދުވެރިކޮށް ޕޭމަންޓް ޕްރޮސެސްކުރުމުގައި ދިމާވާ ދަތިތަކުން އަރައިގަތުމަށް ރާއްޖޭގެ ވިޔަފާރިތަކަށް އެހީތެރިވެދޭނެ ހައްލުތައް ހޯދުމުގައި ވަރަށް މުހިންމު ބައްދަލުވުމެކެވެ.

މި މަޝްވަރާގެ މައިގަނޑު އަމާޒަކީ ޕޭމަންޓް ސިސްޓަމްތައް ރަނގަޅު ކުރެވޭނެ ގޮތްތައް ދެނެގަނެ، ރާއްޖޭގެ އީ-ކޮމާސް މިއަށްވުރެ ރަނގަޅަށް ހިންގޭނެ ގޮތްތައް ދެނެގަތުމެވެ. މިކަންކަމަށް ހައްލެއް ހޯދައިގެން ވިޔަފާރިތަކަށާއި ހިދުމަތްތައް ހޯދާ ފަރާތްތަކަށް ވެސް މިކަމުގެ ފަސޭހަ ލިބިގަތުމެވެ.

ޕޭޕަލްގެ އިތުރުން އެހެން ގައުމުތަކުގެ އީ-ވޮލެޓް ތައާރަފް ކުރުމަށް ސަރުކާރުން ދަނީ ގަދައަޅައި މަސައްކަތް ކުރަމުންނެވެ. މީގެ ތެރޭގައި އިންޑިއާ ރުޕޭ ކާޑު ބޭނުންކުރުމަށް މުހިންމު މަސައްކަތްތައް ކުރެވެމުން އެބަދެއެވެ. މިގޮތުން މި މަޤްޞަދު ޙާޞިލުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިސްކަންދޭ ކަމެއް ކަމުގައި، ވަޒީރު ސައީދު ފާހަގަކުރެއްވިއެވެ.

ޕޭޕަލް އަކީ އޮންލައިންކޮށް ފައިސާ ފޮނުވުމާއި ލިބުން ފަސޭހަ ކުރުމަށް އުފައްދާފައިވާ އީ-ވޮލެޓް އެޕްލިކޭޝަނެކެވެ. ރާއްޖޭގައި ފުދޭވަރަކަށް މަގުބޫލު ނަމަވެސް މިވަގުތު މި އެޕްލިކޭޝަންގެ ބޭނުން ރާއްޖޭގައި ހަމައެކަނި ކުރެވެނީ ބިދޭސީން ފައިސާ ފޮނުވުމަށެވެ. ދިވެހިންނަށް ޕޭޕަލް މެދުވެރިކޮށް ފައިސާ ލިބިގަނެވޭނެ ގޮތެއް ރާއްޖޭގައި ހަމަޖެހިފައި އަދި ނެތެވެ. ޕޭޕަލްގެ އިތުރުން އެހެން ގައުމުތަކުގެ އީ-ވޮލެޓް ތައާރަފް ކުރުމަށް ސަރުކާރުން ގަދައަޅައި މަސައްކަތް ކުރަމުންދާއިރު، އިންޑިއާ ރުޕޭ ކާޑު ބޭނުންކުރުމަށް މުހިންމު މަސައްކަތްތަކެއްވެސް ދަނީ ކުރެވެމުންމެވެ.