ނުކުޅެދުންތެރިކަން ހުންނަ ފަރާތްތަކުގެ ބަދަލުގައި ބެލެނިވެރިންނަށް ފްލެޓަށް ހުށަހެޅުމުގެ ފުރުސަތު ހުޅުވާލައިފި

ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކުގެ ދަށުން، ޚާއްޞަ އިސްކަންދެވޭ ނުކުޅެދުންތެރިކަން ހުންނަ ފަރާތްތަކުގެ ކެޓަގަރީން ފްލެޓަށް އެދި ހުށަހެޅުމުގައި ބޮޑު ލުޔެއް ދީފިއެވެ.

މި ބަދަލާއެކު، ނުކުޅެދުންތެރިކަން ހުންނަ ފަރާތުގެ ބަދަލުގައި އެ ފަރާތުގެ ބެލެނިވެރިޔާއަށް ނުވަތަ ޝަރުޢީ ބަލަދުވެރިޔާއަށް ފްލެޓަށް އެދި ހުށަހެޅުމުގެ ފުރުސަތު މިހާރު ވަނީ ރަސްމީކޮށް ހުޅުވާލާފައެވެ. މިއީ ނުކުޅެދުންތެރިކަން ހުންނަ ފަރާތްތަކަށް ބޯހިޔާވަހިކަން ހޯދައިދިނުމުގައި ދިމާވާ ދަތިތައް ހައްލުކޮށް، އެ ފަރާތްތަކުގެ ހައްގުތައް ކަށަވަރުކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ނިންމެވި ނިންމެވުމެކެވެ.

ފްލެޓަށް އެދި ހުށަހެޅުމަށް ހަމަޖެހިފައިވާ ސުންގަޑިތަކަށް ބަލާއިރު، ޚާއްޞަ އިސްކަންދެވޭ ނުކުޅެދުންތެރިކަން ހުންނަ ފަރާތްތަކުގެ ކެޓަގަރީން ފޯމު ހުށަހެޅުމުގެ އެންމެ ފަހު ތާރީޚަކީ 15 ޖޫން 2026 އެވެ. މިއީ އެ ފަރާތްތަކަށް ބޭނުންވާ ލިޔެކިޔުންތައް ހަމަކުރުމަށް އެކަށީގެންވާ ވަގުތު ދިނުމުގެ މަގުސަދުގައި އިތުރުކޮށްދީފައިވާ މުއްދަތެކެވެ.

ނަމަވެސް، ބޯހިޔާވަހިކަމުގެ މަޝްރޫއުގެ ދަށުން ހިމެނޭ އެހެން ހުރިހާ ކެޓަގަރީތަކަކާއި ސްކީމުތަކަށް ފޯމު ހުށަހެޅުމުގެ ސުންގަޑިއަކީ 31 މޭ 2026 އެވެ.

ސަރުކާރުގެ އަމާޒަކީ ދެފުށް ފެންނަ، އިންސާފުވެރި ނިޒާމެއްގެ ތެރެއިން ހުރިހާ ރައްޔިތުންނަށް ބޯހިޔާވަހިކަން ފޯރުކޮށްދިނުމެވެ. މި މަސައްކަތުގެ ދަށުން، ނުކުޅެދުންތެރިކަން ހުންނަ ފަރާތްތަކަށް ދެވޭ މި ލުޔަކީ އެ ފަރާތްތަކުގެ ދިރިއުޅުމުގެ ފެންވަރު މަތިކުރުމަށް އެޅުނު މުހިންމު ފިޔަވަޅެއްގެ ގޮތުގައި ސަރުކާރުން ސިފަކުރެއެވެ.

ފްލެޓަށް އެދި ހުށަހަޅާ ފަރާތްތަކުން ކަނޑައެޅިފައިވާ ތާރީޚުގެ ކުރިން ހުރިހާ ލިޔެކިޔުންތަކެއް ފުރިހަމަކޮށް ހުށަހެޅުމަށް ކަމާބެހޭ އިދާރާތަކުން އިލްތިމާސްކުރެއެވެ.