އެމް.ޑަބްލިޔޫ.އެސް.ސީ އާއި މައުމޫން ފައުންޑޭޝަން ގުޅިގެން މަތީ ތައުލީމުގެ ސްކޮލަޝިޕެއް

މާލެ ވޯޓަރ އެންޑް ސުވަރޭޖް ކޮމްޕެނީ (އެމް.ޑަބްލިޔޫ.އެސް.ސީ) އާއި މައުމޫން ފައުންޑޭޝަން ގުޅިގެން މަތީ ތައުލީމުގެ ފުރުސަތުތައް ފަހިކޮށްދިނުމަށްޓަކައި މުހިންމު އެއްބަސްވުމެއްގައި މިއަދު ސޮއިކޮށްފިއެވެ.

މި އެއްބަސްވުމުގައި އެމް.ޑަބްލިޔޫ.އެސް.ސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޙުސައިން ފަހުމީއެވެ. މައުމޫން ފައުންޑޭޝަންގެ ފަރާތުން ސޮއިކުރެއްވީ އެ ފައުންޑޭޝަންގެ ވައިސް ޗެއަރމަން އަލްއުސްތާޛު ފާރިސް މައުމޫނެވެ.

މިއީ އެމް.ޑަބްލިޔޫ.އެސް.ސީގެ އިޖުތިމާއީ ޒިންމާ (ސީ.އެސް.އާރް) ގެ ދަށުން، ރާއްޖޭގެ ދަރިވަރުންނަށް މަތީ ތައުލީމުގެ ފުރުސަތުތައް ހޯދައިދީ، ގައުމަށް ބޭނުންތެރި ފަންނީ މީހުން ބިނާކުރުމަށް އެހީތެރިވުމުގެ މަގުސަދުގައި ކުރިއަށްގެންދާ މަޝްރޫއެކެވެ.

މި އެއްބަސްވުމުގެ ދަށުން، ދިވެހިރާއްޖޭގެ ގައުމީ ޔުނިވަރސިޓީގައި މާސްޓާސް ޑިގްރީއަށް ކިޔެވުމަށް އެއް ދަރިވަރަކަށް ސްކޮލަޝިޕްގެ ފުރުސަތު ދިނުމަށް ވަނީ ހަމަޖެހިފައެވެ. މި ސްކޮލަޝިޕްގެ މައިގަނޑު ބޭނުމަކީ ރާއްޖޭގެ މަސައްކަތްތެރިކަމުގެ ބާޒާރަށް ތައުލީމީ އަދި ހުނަރުވެރި ދިވެހިން ނެރުމަށް ބާރުއެޅުމެވެ.

މައުމޫން ފައުންޑޭޝަނަކީ ކުރީގެ ރައީސް އަލްއުސްތާޛު މައުމޫން އަބްދުލްގައްޔޫމް އިސްނަންގަވައިގެން، އިޖުތިމާއީ އަދި އިންސާނީ އެކި މަސައްކަތްތައް ކުރެއްވުމަށް އުފައްދާފައިވާ ޖަމިއްޔާއެކެވެ. މީގެ ކުރިންވެސް އެ ފައުންޑޭޝަނުން ވަނީ ދިވެހި ދަރިވަރުންނަށް ތައުލީމީ ގިނަ ފުރުސަތުތަކެއް ފަހިކޮށްދީފައެވެ.