އިނގިރޭސިވިލާތުން ދިވެހި މަހުގެ ޓެރިފް ކަނޑައިލުމުން ޕީއެންސީއިން ރައީސް މުޢިއްޒަށް މަރުޙަބާ ދަންނަވައިފި

ދިވެހިރާއްޖެއިން އިނގިރޭސިވިލާތަށް އެކްސްޕޯޓުކުރާ މަހާއި މަހުގެ އުފެއްދުންތަކުން ނަގަމުން އައި ޓެރިފް ކަނޑައިލުމަށް އެ ޤައުމުގެ ސަރުކާރުން ނިންމުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި ދިވެހި ސަރުކާރަށް، ވެރިކަން ކުރާ ޕީޕަލްްސް ނެޝަނަލް ކޮންގްރެސް (ޕީއެންސީ) އިން މަރުޙަބާ ކިޔައިފިއެވެ.

ޕީއެންސީން ނެރުނު ބަޔާނުގައި ބުނެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ޙަވާލުވެވަޑައިގެން އެންމެ ބޮޑު އިސްކަމެއް ދެއްވައިގެން ކުރައްވަމުންދާ މަސައްކަތްޕުޅަކީ ދިވެހިރާއްޖޭގެ މަސްވެރިކަމުގެ ސިނާއަތް ވެއްޓިފައި އޮތް އަނދަވަޅުން ސަލާމަތްކުރެއްވުން ކަމަށެވެ. އަދި އެ ސިނާއަތަށް އައު ފަހިކަމާއި ކުރިއެރުން ހޯއްދަވައިދެއްވުމަށްޓަކައި އެމަނިކުފާނު ގިނަގުނަ މަސައްކަތްޕުޅުތަކެއް ފައްޓަވާފައިވާތީ، ދިވެހި މަސްވެރިންނާއި މަސްވެރި އާއިލާތަކުގެ ނަމުގައި އެ ޕާޓީން ވަނީ ޝުކުރު އަދާކޮށްފައެވެ.

މި ބަޔާނުގައި އިތުރަށް ފާހަގަކޮށްފައިވާ ގޮތުގައި، ރައީސްގެ އެންމެ އިސް އެއް އަމާޒަކީ ދިވެހި މަސްވެރިން ބާނާ މަހަށް އެކަށީގެންވާ ރަނގަޅު އަގެއް ހޯދައިދެއްވުމެވެ. އެގޮތުން ބައިނަލްއަޤުވާމީ އައު ބާޒާރުތަކުން ދިވެހި މަހަށް ޖާގަ ހޯދައިދެއްވުމަށް ސަރުކާރުން ކުރަމުންދާ މަސައްކަތްތައް ޕީއެންސީން ފާހަގަކުރެއެވެ.

އިނގިރޭސިވިލާތަކީ ރާއްޖެއިން މިހާރުވެސް ގިނަ އަދަދަކަށް މަހުގެ އުފެއްދުންތައް ބޭރުކުރާ ޤައުމަކަށްވާއިރު، އެ ޤައުމުގެ ސަރުކާރާއެކު ރައީސް ކުރެއްވި މަޝްވަރާތަކުގެ ނަތީޖާއެއްގެ ގޮތުން 20 މޭ 2026 އިން ފެށިގެން ޓެރިފް ނުނަގާ ގޮތަށް ހަމަޖެހުމަކީ މަސްވެރިންނަށާއި ވިޔަފާރިތަކަށް ލިބުނު ވަރަށް ބޮޑު ކުރިއެރުމެކެވެ. ރައީސް ޑރ. މުޢިއްޒު އިނގިރޭސިވިލާތަށް ކުރެއްވި ރަސްމީ ދަތުރުފުޅުގައި އެ ޤައުމުގެ ރަސްގެފާނު، ޗާލްސް ތިންވަނައާއި ސަރުކާރުގެ އިސްވެރިންނާ ބައްދަލުކުރައްވައި އެންމެ ބޮޑަށް އެދިވަޑައިގަތީވެސް މި ޓެރިފް ކަނޑައިދިނުމަށެވެ.

ތަފާސް ހިސާބުތަކުން ދައްކާގޮތުގައި ރާއްޖެއަކީ އިނގިރޭސިވިލާތަށް އެންމެ ގިނައިން މަސް ބޭރުކުރާ ޤައުމުތަކުގެ ލިސްޓުގެ 9 ވަނައިގައި އޮތް ޤައުމެވެ. އަހަރެއްގެ މައްޗަށް އެވްރެޖުކޮށް 16 އާއި 18 މިލިއަން ޕައުންޑާ ދެމެދުގެ އަދަދަކަށް މަހުގެ އުފެއްދުންތައް އެ ޤައުމަށް ބޭރުކުރެއެވެ. މިހާތަނަށް މިކަމުގައި އޮތް އެންމެ ބޮޑު ހުރަހަކީ ބޮޑު ޓެރިފެއް ނެގުން ކަމަށްވާއިރު، އެ ހުރަސް ނެތިދިއުމަކީ މަސްވެރިކަމުގެ ސިނާއަތުގެ އާމްދަނީ އިތުރުކުރުމަށް ލިބުނު "ރަނުގެ ފުރުސަތެއް" ކަމަށް ޕީއެންސީން ސިފަކުރެއެވެ.

މީގެ އިތުރުން، މަސްވެރިން ކިރުވާ މަހަށް 48 ގަޑިއިރު ތެރޭ ފައިސާ ލިބޭނެ އިންތިޒާމު ހަމަޖެއްސެވުމާއި، ހެޔޮ އަގުގައި ތެޔޮ ލިބޭނެ ގޮތް ހެއްދެވުމާއި، އޮޑިފަހަރުގައި ލޮނުން ގަނޑުފެން އުފެއްދޭނެ ނިޒާމު ޤާއިމުކުރުމަށް މާލީ އެހީ ދެއްވުން ފަދަ ކަންކަން ރައީސް ކުރައްވަމުން ގެންދަވާކަން ބަޔާނުގައި ފާހަގަކޮށްފައިވެއެވެ. އަދި ދިވެހި މަސްވެރިކަން ޕްރޮމޯޓުކުރުމަށް ވަކި ކުންފުންޏެއް އުފައްދަވައި، މި ސިނާއަތް މުޅިން އައު ޒަމާނަކަށް ގެންދިއުމަށް ކުރައްވާ މަސައްކަތްތަކަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި އެމަނިކުފާނުގެ ސަރުކާރަށް ޕީއެންސީން ވަނީ އަނެއްކާވެސް މަރުޙަބާ ދަންނަވާފައެވެ.