ދިވެހިރާއްޖޭގެ ކްރިކެޓް ކުރިއެރުވުމަށް ލަންކާގެ އެހީތެރިކަން ހޯދަނީ!

ދިވެހިރާއްޖޭގެ ކްރިކެޓް ކުރިއެރުވުމަށް އަވަށްޓެރި ސްރީލަންކާ އިން އެހީތެރިވާން ތައްޔާރަށް އޮތްކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ޓީ20 ޕްރެޒިޑެންޓްސް ކަޕް 2024 ގެ އިނާމް ދިނުމުގެ ރަސްމިއްޔާތުގައި ވާހަކަދައްކަވަމުން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވީ ސާކް ސަރަހައްދަކީ ކްރިކެޓުގައި ވަރުގަދަ ގައުމަތައް ހިމެނޭ ސަރަހައްދަކަށްވެފައި، ކްރިކެޓް ކުރިއެރުވުމަށް މި ސަރަހައްދުގެ ގައުމުތަކުން އެހީތެރިކަން ހޯދުން މުހިންމު ކަމަށެވެ.

މި ކަމާ ގުޅޭ ގޮތުން ސްރީލަންކާގެ ކުޅިވަރު ވަޒީރާއިއެކު މަޝްވަރާ ކުރެވިފައިވާކަމަށާއި، އެ ގައުމުން ތިބީ ދިވެހިރާއްޖެއަށް އެހީވާން ތައްޔާރަށްކަމަށެވެ.

މިނިސްޓަރ ވިދާޅުވީ ސްރީލަންކާގެ ކުޅިވަރު ވަޒީރާއިއެކު ކުރިއަށްދިޔަ ބައްދަލުވުމުގައި ރާއްޖޭގެ ކްރިކެޓް ކުރިއެރުވުމާ ގުޅޭގޮތުން ގިނަ ވާހަކަތަކެއް ދެކެވުނުކަމަށާއި، ދިވެހިރާއްޖެއަށް އެހީތެރިވެދެއްވާނެކަމުގެ ޔަގީންކަން ސްރީލަންކާގެ ވަޒީރު ދެއްވިކަމަށެވެ.