ރައީސް މުޢިއްޒުގެ ފޭވަރިޓަކީ އާޖެންޓީނާ؛ ވޯލްޑްކަޕްގެ ފޯރި މުޅި ރާއްޖެއަށް

މުޅި ދުނިޔެ ސިއްސުވާލާ ފީފާ ވޯލްޑްކަޕް ފުޓްބޯޅަ މުބާރާތް މާދަމާ ރޭ ފެށުމަށް ތައްޔާރުވަމުންދާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތާއީދުކުރައްވާ ޓީމަކީ އާޖެންޓީނާކަން ހާމަކުރައްވައިފިއެވެ.

މި މުބާރާތުގެ ފޯރި މުޅި ދުނިޔޭގައި ގަދަވެފައިވާއިރު، ފުޓްބޯޅައަށް އިންތިހާއަށް ލޯބިކުރާ ދިވެހި ރައްޔިތުން ވެސް އަންނަނީ މި ބޮޑު އީދަށް ކުލަގަދަ ތައްޔާރީތަކެއް ވަމުންނެވެ. އެގޮތުން ރާއްޖޭގެ އެކި ކަންކޮޅުތަކުގައި ސަޕޯޓްކުރާ ޓީމުތަކުގެ ދިދަފަތިތައް ދެމުމާއި، ބޮޑެތި ސްކްރީންތަކުގައި މެޗު ބެލޭނެ އިންތިޒާމުތައް ހަމަޖެއްސުމުގެ މަސައްކަތް ބާރުސްޕީޑުގައި ދަނީ ކުރިއަށެވެ.

ވޯލްޑްކަޕާ ގުޅިގެން މިނިސްޓްރީ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނެސް އިން ވަނީ ޚާއްޞަ ހަރަކާތްތަކެއް ރާވާފައެވެ. މިކަމާ ގުޅޭގޮތުން ޔޫތު މިނިސްޓަރ އިބްރާހީމް ރާފިޢުއާއެކު ބޭއްވި ބައްދަލުވުމެއްގައި، ރައީސް މުޢިއްޒު ވަނީ މުބާރާތަށް ތައްޔާރުކޮށްފައިވާ ޚާއްޞަ ބޯޅަތަކެއްގައި ސޮއިކުރައްވާފައެވެ. މި ބޯޅަތަކަކީ ރާއްޖޭގެ ފުޓްބޯޅަ ލެޖެންޑުންގެ އަގުވަޒަންކުރުމުގެ ގޮތުން އެ ބޭފުޅުންނަށް ހަދިޔާކުރަން ނިންމާފައިވާ ބޯޅަތަކެކެވެ.

މި ބައްދަލުވުމުގެ ތެރެއިން މިނިސްޓަރ ރާފިޢު ކުރެއްވި ސުވާލަކަށް ޖަވާބު ދެއްވަމުން ރައީސް ވިދާޅުވީ، އެމަނިކުފާނަކީ ވަރަށް ކުޑައިރުއްސުރެ އާޖެންޓީނާގެ ސަޕޯޓަރެއް ކަމަށެވެ. "އަޅުގަނޑު މިއީ ވަރަށް ކުޑައިރުއްސުރެ އާޖެންޓީނާގެ ސަޕޯޓަރެއް. އެ ޓީމަށް ތާއީދުކުރަން ފެށުނީ އާޖެންޓީނާގެ ލެޖެންޑް މެރެޑޯނާގެ ކުޅުމަށް އުފެދުނު ލޯތްބެއްގެ ސަބަބުން،" ރައީސް ވިދާޅުވިއެވެ.

މީގެ އިތުރުން، އާޖެންޓީނާ ނޫން ދެން އެންމެ ބޮޑަށް ގަޔާވާ ޓީމަކީ އިނގިރޭސިވިލާތް (އިންގްލެންޑް) ކަން ވެސް ރައީސް ހާމަކުރެއްވިއެވެ. އިނގިރޭސި ޕްރިމިއާ ލީގުގެ މެންޗެސްޓަރ ޔުނައިޓެޑަށް ސަޕޯޓްކުރައްވާ ރައީސް ވިދާޅުވީ، އިނގިރޭސި ޓީމަށް ލޯބި ޖެހުނީ އެ ޤައުމުގައި މަތީ ތަޢުލީމު ހާސިލުކުރެއްވި ދުވަސްވަރު ކަމަށެވެ.

މި ފަހަރުގެ މުބާރާތުގެ ފޯވަރިކާ ބެހޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މުބާރާތުގެ ވަގުތުތައް ހުރި ގޮތުން ހުރިހާ މެޗެއް ބަލައިނުލެވުނު ނަމަވެސް، މުހިންމު މެޗުތައް ބެއްލެވުމަށް ވަގުތު ހޯއްދަވާނެ ކަމަށެވެ. އަދި މި ފަހަރުގެ މުބާރާތަކީ ހައިރާންކުރުވަނިވި ނަތީޖާތަކެއް ފެނިގެންދާނެ މުބާރާތަކަށް ވެދާނެ ކަމަށް ލަފާކުރައްވަމުން، ފްރާންސްގެ ވަރުގަދަކަމާއި ހޮލެންޑުން ތަށި ހޯދުމުގެ ފުރުޞަތު އޮތްކަން ވެސް ފާހަގަކުރެއްވިއެވެ.

ރައީސުލްޖުމްހޫރިއްޔާ ވަނީ ރާއްޖޭގެ ޒުވާނުންނާއި ހުރިހާ ރައްޔިތުންނަށް ފަސޭހަކަމާއެކު ވޯލްޑްކަޕް ބެލޭނެ އިންތިޒާމުތައް ހަމަޖެއްސުމަށް މިނިސްޓަރ ރާފިޢުއަށް އިރުޝާދު ދެއްވާފައެވެ. އެގޮތުން ގިނަ ބަޔަކު އެއްވެގެން މެޗު ބެލޭނެ މާހައުލުތައް ޤާއިމުކުރުމަކީ އެމަނިކުފާނު ވަރަށް ބޮޑު އިސްކަމެއް ދެއްވާ ކަމެއްކަމަށް ވިދާޅުވިއެވެ.