ޝަމްޢާން ރިޝްވަތު ހިފި މައްސަލައިގެ ތަފްސީލު ފުލުހުން ހާމަކޮށްފި

އިމިގްރޭޝަންގެ ކުރީގެ ކޮންޓްރޯލަރ ޖެނެރަލް މުޙައްމަދު ޝަމްޢާން ވަޙީދާއި އެ މުއައްސަސާގެ ބައެއް މުވައްޒަފުން ގުޅިގެން ހިންގާފައިވާ ކަމަށް ތުހުމަތުކުރެވޭ ކޮރަޕްޝަނާއި މަނީ ލޯންޑަރިންގގެ ބޮޑެތި މައްސަލަތަކެއްގެ ތަފްސީލު ދިވެހި ފުލުހުންގެ ޚިދުމަތުން ހާމަކޮށްފިއެވެ.

ފުލުހުން މި މަޢުލޫމާތު ހާމަކޮށްފައިވަނީ، 2026 ޖޫން 9 ވަނަ ދުވަހު ޝަމްޢާން މީޑިއާތަކާ ބައްދަލުކޮށް ފުލުހުންގެ ތަހުގީގާ މެދު ކޮށްފައިވާ ތުހުމަތުތަކަށް ރައްދު ދިނުމުގެ ގޮތުން ނެރުނު ބަޔާނެއްގައެވެ.

ފުލުހުންގެ ތަހުގީގަށް ހާމަވެފައިވާ ގޮތުގައި، 2025 މާރިޗު 11 ވަނަ ދުވަހުގެ ރޭ އިމިގްރޭޝަނުން ހިންގި އޮޕަރޭޝަނެއްގައި އަތުލައިގަތް ބިދޭސީންގެ ތެރެއިން މީހަކު މިނިވަންކުރުމަށް ޝަމްޢާން ވަނީ ނުފޫޒު ފޯރުވާފައެވެ. މިގޮތުން، ސްޕޮންސަރުގެ ނަމުގައި ފޮނުވި އީމެއިލަކާ ގުޅިގެން އެ ބިދޭސީމީހާ އަވަހަށް ދޫކޮށްލުމަށް ޝަމްޢާން އިރުޝާދު ދެއްވިކަން ތަހުގީގަށް ވަނީ ކަށަވަރުވެފައެވެ.

މި މައްސަލައިގެ އެންމެ ނުރައްކާތެރި ހާމަވުމަކީ، އެ ބިދޭސީމީހާ ދޫކޮށްލުމުގެ ބަދަލެއްގެ ގޮތުން 500,000 (ފަސްލައްކަ) ރުފިޔާ އަށް އެއްބަސްވެ، އެ ފައިސާ ޝަމްޢާނާ ހަވާލުކުރި ކަމަށް ބުނާ ބުނުމެވެ. ފުލުހުން ބުނި ގޮތުގައި، އިމިގްރޭޝަންގެ ދެ މުވައްޒަފަކު ދަންވަރު 3:00 އެހައިކަންހާއިރު ފައިސާ ހުރި ކޮތަޅެއް ހިފައިގެން ޝަމްޢާން ދިރިއުޅޭ އެޕާޓްމަންޓަށް ވަދެ، ތިން މިނެޓް ފަހުން ނުކުތްއިރު އެމީހުންގެ އަތުގައި އެ ކޮތަޅެއް ނެތެވެ. އަދި ޖެހިގެން އައި ދުވަހު ޝަމްޢާންގެ ބޭންކް އެކައުންޓްތަކަށް ދެލައްކައަށްވުރެ ގިނަ ރުފިޔާ ޖަމާކޮށްފައިވާކަން ވެސް ތަހުގީގަށް ވަނީ ފާހަގަކުރެވިފައެވެ.

ޝަމްޢާން މީޑިއާގައި ވިދާޅުވެފައިވަނީ އޭނާގެ ފޯނުގައި ކޮރަޕްޝަނާ ގުޅޭ ހެކި ހުރި ކަމަށެވެ. ނަމަވެސް ފުލުހުން ވިދާޅުވީ، ތަހުގީގުގެ އެއްވެސް މަރުހަލާއެއްގައި ފޯނު ހުޅުވުމަށް ބޭނުންވާ ލޮކް ކޯޑު އޭނާ ދީފައިނުވާ ކަމަށާއި، އަދި ބަންދުން ދޫކޮށްލުމަށްފަހު ވެސް އެފަދަ އެއްވެސް މައުލޫމާތެއް ރަސްމީ އިދާރާއަކާ ހިއްސާކޮށްފައި ނުވާ ކަމަށެވެ.

ފުލުހުން އިތުރަށް ބަޔާންކުރި ގޮތުގައި، މި ތަހުގީގަކީ ސިޔާސީ ނުފޫޒުން އެއްކިބާވެ، ހެކީގެ މައްޗަށް ބިނާކޮށް ހިންގާފައިވާ މިނިވަން ތަހުގީގެކެވެ. މި މައްސަލައިގައި ކްރިމިނަލް ކޯޓުން މިހާރު ވަނީ ހުކުމް އިއްވާފައެވެ. ފުލުހުން ވަނީ ކޯޓުގެ ނިންމުމަށް އިހުތިރާމް ކުރުމަށާއި، ހިތްހަމަނުޖެހުމެއް އޮތް ނަމަ އިސްތިއުނާފުގެ މަރުހަލާ އިޚްތިޔާރު ކުރުމަށް އިލްތިމާސްކޮށްފައެވެ.