ޖޯޑަންގެ މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ތަހުނިޔާ ފޮނުއްވައިފި
ޖޯޑަންގެ މިނިވަން ދުވަހުގެ ބަރަކާތްތެރި މުނާސަބަތާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޖޯޑަންގެ ރަސްގެފާނު އަބްދުالله ދެވަނައަށާއި، އެ ގައުމުގެ ބޮޑުވަޒީރު ޖައުފަރު ހައްސާނަށް ތަހުނިޔާ ފޮނުއްވައިފިއެވެ.
މި މުނާސަބަތާ ގުޅިގެން ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި، ޖޯޑަންގެ ސަރުކާރަށާއި އެ ގައުމުގެ ރައްޔިތުންނަށް ދިވެހި ސަރުކާރާއި ރައްޔިތުންގެ ނަމުގައި އިޚްލާސްތެރި ތަހުނިޔާ ވަނީ އަރިކުރައްވާފައެވެ. އަދި މި އުފާވެރި ދުވަހަކީ ޖޯޑަންގެ ރައްޔިތުންނަށް އިތުރު އެކުވެރިކަމާއި، ހަމަޖެހުމާއި، ބޮޑެތި ކާމިޔާބީތައް ގެނެސްދޭނެ ދުވަހެއްގެ ގޮތުގައި ރައީސް ސިފަކުރެއްވިއެވެ.
ރައީސުލްޖުމްހޫރިއްޔާގެ މެސެޖުގައި އިތުރަށް ފާހަގަކުރެއްވި ގޮތުގައި، ދިވެހިރާއްޖެއާއި ޖޯޑަންއާ ދެމެދު އޮތް ގާތް ގުޅުމަކީ އެއް ދީނަކާއި އެއްގޮތް އަގުތަކެއްގެ މައްޗަށް ބިނާވެފައިވާ ވަރުގަދަ ގުޅުމެކެވެ. މީގެ އިތުރުން، ދެ ގައުމުގެ މެދުގައި އޮތް އަޚުވަންތަ ގުޅުން ކުރިމަގުގައި އިތުރަށް ބަދަހިވެ، ހެޔޮނިޔަތާއި އެއްބައިވަންތަކަމާއެކު ދެ ގައުމުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތްކުރުމަށް އެދިވަޑައިގަންނަވާކަމަށް ވެސް ރައީސް ވިދާޅުވިއެވެ.
ޖޯޑަންއަކީ އިސްލާމީ އުންމަތުގެ މުހިންމު ގައުމަކަށްވާއިރު، ރާއްޖެއާއި ޖޯޑަންއާ ދެމެދު އަބަދުވެސް އަންނަނީ ބައިނަލްއަގުވާމީ މައިދާނުގައި ގާތް ގުޅުމެއް ބާއްވަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
