ދިވެހި ބަހާއި ގައުމިއްޔަތާ ބެހޭ ޚާއްޞަ މުޝީރުގެ މަގާމުން އާދަމް ނަޞީރު އިބްރާހީމް އިސްތިއުފާ ދެއްވައިފި
ދިވެހި ބަހާއި ސަގާފަތާއި ތަރިކައާ ބެހޭ ކުރީގެ ވަޒީރު އާދަމް ނަޞީރު އިބްރާހީމް، ރައީސުލްޖުމްހޫރިއްޔާގެ އޮފީހުގެ "ސްޕެޝަލް އެޑްވައިޒަރ އޮން ދިވެހި ލޭންގުއޭޖް އެންޑް ނޭޝަނަލިޒަމް" ގެ މަގާމަށް އައްޔަންކުރެއްވިތާ އެއްދުވަސް ތެރޭގައި އެ މަގާމުން މިއަދު ކުއްލި ގޮތަކަށް އިސްތިއުފާ ދެއްވައިފިއެވެ.
ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ކުރިން ވިދާޅުވެފައިވަނީ، އާދަމް ނަޞީރު އިއްޔެ އެ މަގާމަށް އައްޔަންކުރެއްވުމާ ގުޅިގެން މިއަދު މަސައްކަތަށް ނުކުމެވަޑައިގެން ޚިދުމަތް ފަށްޓަވާފައިވާ ކަމަށެވެ. ނަމަވެސް، މުންދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އާދަމް ނަޞީރު މިއަދުގެ ވަގުތެއްގައި މަގާމުން އިސްތިއުފާ ދެއްވާފައިވާ ކަމަށެވެ.
މި ކުއްލި އިސްތިއުފާއާ ގުޅޭގޮތުން އާދަމް ނަޞީރުގެ ފަރާތުންނާއި ސަރުކާރުގެ ފަރާތުންވެސް ވަކި ސަބަބެއް މިހާތަނަށް ހާމަކޮށްފައެއް ނުވެއެވެ.
އާދަމް ނަޞީރު އިބްރާހީމަކީ މިދިޔަ އޭޕްރީލް މަހު ކެބިނެޓުގެ ނުވަ ވަޒީރަކާއެކު މަގާމުން އިސްތިއުފާ ދެއްވި ބޭފުޅެކެވެ. އޭނާގެ އިތުރުން އެދުވަހު އިސްތިއުފާ ދެއްވި އެހެން ބައެއް ވަޒީރުން މިހާރު ވަނީ ދައުލަތުގެ އެކި އިސް މަގާމުތަކަށް އައްޔަންކުރައްވާފައެވެ.
އެގޮތުން، ކުރީގެ ހެލްތު މިނިސްޓަރު ޢަބްދުﷲ ނާޒިމް އިބްރާހީމް ވަނީ ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯގެ މަގާމަށް އައްޔަންކުރައްވާފައެވެ. އަދި ކުރީގެ ލޯކަލް ގަވަރމަންޓް މިނިސްޓަރު އާދަމް ޝަރީފް އުމަރު ގަތަރުގައި ހުންނަވާ ދިވެހި ސަފީރުގެ މަގާމަށް އައްޔަންކުރައްވާފައިވާއިރު، ކުރީގެ ޓޫރިޒަމް މިނިސްޓަރު ތާރިގް އިބްރާހީމް ވަނީ ޔޫއޭއީގައި ހުންނަވާ ދިވެހި ސަފީރުގެ މަގާމަށް އައްޔަންކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
