ރާއްޖޭގެ ހުރިހާ ރަށެއްގައި ފިޓްނަސް މަރުކަޒުތަކާއި އިންޑޯ ކޮމްޕްލެކްސްތައް އެޅުމުގެ މަސައްކަތް ބާރުދުވެލީގައި
ރާއްޖޭގެ އެއްވެސް ރަށެއް ބާކީނުކޮށް، ކޮންމެ ރަށެއްގައި އެންމެ ޒަމާނީ ފެންވަރުގެ ފިޓްނަސް ރެކްރިއޭޝަން މަރުކަޒުތަކާއި އައުޓްޑޯ ޖިމްތައް ގާއިމުކުރުމުގެ މަސައްކަތް ކުރިއަށްދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުން އަލަށް ފެށި "ދަ ޕަލްސް" ޕޮޑްކާސްޓްގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ޒުވާނުންގެ ދުޅަހެޔޮކަމަށް އަމާޒުކޮށްގެން ފަށާފައިވާ މި މަޝްރޫޢުގެ ދަށުން، މިއަހަރުގެ ނިޔަލަށް ރާއްޖޭގެ ގާތްގަނޑަކަށް ދެބައިކުޅަ އެއްބައި ރަށްތަކުގައި މި މަސައްކަތް ނިމޭނެ ކަމަށެވެ. އަދި 2025 ވަނަ އަހަރުގެ ނޮވެމްބަރު މަހާ ހަމައަށްދާއިރު ހުރިހާ ރަށެއްގައި މި ވަސީލަތްތައް ގާއިމުކޮށް ނިންމުމަކީ ސަރުކާރުގެ އަމާޒެއް ކަމަށް އެމަނިކުފާނު ވިދާޅުވިއެވެ.
މީގެ އިތުރުން، އާބާދީ ބޮޑު ރަށްރަށުގައި 1,200 މީހުންގެ ޖާގައިގެ އިންޑޯ ސްޕޯޓްސް ކޮމްޕްލެކްސްތައް އެޅުމުގެ މަސައްކަތް މިހާރު 15 ރަށެއްގައި ފެށިފައިވާކަން ރައީސް ފާހަގަކުރެއްވިއެވެ. މި ތަންތަނަކީ ބޮޑެތި މުބާރާތްތައް ބޭއްވޭނެ ފެންވަރަށް، ބެލުންތެރިންނަށް ތިބެވޭނެ ޖާގައާއެކު ބިނާކުރާ ތަންތަނެވެ. ރައީސް ވިދާޅުވީ މިއީ ރާއްޖޭގެ ތާރީޚުގައިވެސް ޒުވާނުންނަށްޓަކައި މިހާ ފުޅާދާއިރާއެއްގައި ކުޅިވަރުގެ އުމްރާނީ ވަސީލަތްތައް ގާއިމުކުރެވޭ ފުރަތަމަ ފަހަރު ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
