ޕާކިސްތާނުގެ ކުއެޓާގައި ރޭލަކަށް އަމާޒުކޮށް ދިން ހަމަލާއެއްގައި 24 މީހުން މަރުވެއްޖެ

ޕާކިސްތާނުގެ ހުޅަނގު ދެކުނު ޕްރޮވިންސެއް ކަމަށްވާ ބަލޯޗިސްތާނުގެ ވެރިރަށް ކުއެޓާގައި، ސިފައިން ދަތުރުކުރި ރޭލަކަށް އަމާޒުކޮށް ދިން ބާރުގަދަ ގޮއްވުމެއްގައި މަދުވެގެން 24 މީހުން މަރުވެއްޖެއެވެ.

އާދީއްތަ ދުވަހު ދިން މި ހަމަލާގައި މަރުވި މީހުންގެ ތެރޭގައި ޕާކިސްތާނު ސިފައިންގެ މީހުން ހިމެނޭއިރު، މި ހާދިސާގައި 50 އަށްވުރެ ގިނަ މީހުން ޒަޚަމްވެފައިވާ ކަމަށް އެ ގައުމުގެ އިސް އޮފިޝަލުން މައުލޫމާތު ދެއެވެ.

ސަރުކާރުގެ އޮފިޝަލަކު މީޑިއާއަށް މައުލޫމާތު ދެމުން ވިދާޅުވީ، މި ހާދިސާ ހިނގާފައިވަނީ ކުއެޓާގެ "ޗަމަން ޕައްޓަކް" ސިގްނަލާ ދިމާލުން ރޭލު ދަތުރުކުރަމުން ދަނިކޮށް، ގޮވާތަކެތި ފުރާފައިވާ ކާރަކުން ރޭލުގެ ބޯގީއެއްގައި ޖައްސައި ގޮއްވާލައިގެންނެވެ. މި ގޮއްވުމުގެ ބާރުގަދަކަމުން ރޭލުގެ ދެ ބޯގީއެއް ފުރޮޅާލައި، އޭގައި އަލިފާން ރޯވުމުގެ ސަބަބުން މުޅި ސަރަހައްދު ވަނީ ކަޅު ދުމުން ފުރިފައެވެ.

މި ހަމަލާ ދީފައިވަނީ އާންމުކޮށް ސަލާމަތީ ބާރުތައް ހަރަކާތްތެރިވާ ސަރަހައްދެއްގައެވެ. މި ގޮއްވުމުގެ ސަބަބުން ކައިރީގައި ހުރި ބައެއް އިމާރާތްތަކަށް ބޮޑެތި ގެއްލުންތަކެއް ލިބިފައިވާއިރު، މަގުމަތީގައި ޕާކުކޮށްފައި އޮތް 12 އަށްވުރެ ގިނަ އުޅަނދު ވަނީ ބޭނުންނުކުރެވޭ ވަރަށް ހަލާކުވެފައެވެ.

މި ހަމަލާގެ ޒިންމާ މިހާރު ވަނީ ބަލޯޗިސްތާނުގެ ވަކިވެގަންނަން މަސައްކަތްކުރާ ޖަމާއަތެއް ކަމަށްވާ "ބަލޯޗިސްތާން ލިބަރޭޝަން އާމީ" (ބީ.އެލް.އޭ) އިން އުފުލާފައެވެ. ސަލާމަތީ ބާރުތަކުން މިހާރު ދަނީ މި ހާދިސާ އިތުރަށް ތަހުގީގު ކުރަމުންނެވެ.