ފަހި ފްލެޓްތައް ކައިރީގައި 18 ބުރީގެ ކޮމާޝަލް ބިލްޑިންގެއް އަޅަނީ
ހުޅުމާލޭ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީކުރާ ފަހި ފްލެޓްތައް ކައިރީގައި 18 ބުރީގެ ކޮމާޝަލް ބިލްޑިންގެއް އެޅުމަށް އެ ކޯޕަރޭޝަނުން ނިންމައިފިއެވެ.
މި މަޝްރޫއާ ގުޅޭގޮތުން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ނޫހަކަށް މަޢުލޫމާތު ދެއްވަމުން ވިދާޅުވީ، އަމާން ދޯދި ޓަވަރު 16 ކައިރީގައި މި އިމާރާތް އެޅުމުގެ މަސައްކަތް ހަވާލުކޮށްފައިވަނީ ކަންދޫފާ އިންވެސްޓްމަންޓްސްއާ ކަމަށެވެ.
ހަމްދާން ވިދާޅުވި ގޮތުގައި، މި 18 ބުރީގެ އިމާރާތުގެ ހުރިހާ ހަރަދެއް ކުރާނީ އެ މަސައްކަތް ހަވާލުކުރި ކުންފުނިންނެވެ. ނަމަވެސް، މި މަޝްރޫއުގެ އަމަލީ މަސައްކަތް ފަށާނެ ތާރީޚެއް އަދި ކަނޑައެޅިފައެއް ނުވެއެވެ.
އިންޑިއާގެ ދެ ކުންފުންޏަކާ ހަވާލުކޮށްގެން އެފްޑީސީން ކުރިއަށްގެންދާ 4,000 ފްލެޓްގެ މަޝްރޫއުގެ ދަށުން އަޅާފައިވާ ޓަވަރުތަކުގެ ތިރީގައި ޕާކިން އަށް ޖާގަ ހާއްސަކޮށްފައެއް ނުވެއެވެ. އެހެންނަމަވެސް، އަލަށް މި އަޅާ ކޮމާޝަލް ބިލްޑިންގުގެ ސަބަބުން އެ ސަރަހައްދަށް ބޭނުންވާ ޕާކިންގެ ދަތިކަމަށް ހައްލެއް ލިބިގެންދާނެ ކަމަށް ހަމްދާން ފާހަގަކުރެއްވިއެވެ.
މީގެ އިތުރުން، މި އިމާރާތް ނިމުމުން އެފްޑީސީގެ ހެޑް އޮފީސް ވެސް އެ ތަނަށް ބަދަލުކުރުމަށް ވަނީ ނިންމާފައެވެ. އަދި މި އިމާރާތުގައި އޮފީސްތަކަށް ބޭނުންވާ ކޮމާޝަލް ޖާގަތައް ލިބެން ހުންނާނެއެވެ.
ފަހި ދިރިއުޅުން ކޯޕަރޭޝަނުން ތަރައްގީކުރާ މި ފްލެޓްތަކުގެ ގްރައުންޑް ފްލޯ ފަރުމާކޮށްފައިވަނީ ފިހާރަތަކާއި ރެސްޓޯރެންޓްތަކަށް ޖާގަ ނުހިމެނޭ ގޮތަށް ކަމަށްވާތީ، މި އާ އިމާރާތަކީ އެ ސަރަހައްދުގައި ދިރިއުޅޭ ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމަށް މުހިންމު ބިނާއަކަށް ވެގެންދާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
