ނައިފަރުގެ ބިން ހިއްކުމުގެ މަސައްކަތް ނިމި، ގޮނޑުދޮށް ހިމާޔަތްކުރުމުގެ އަމަލީ މަސައްކަތް ބާރުދުވެލީގައި ކުރިއަށް
ޅ. ނައިފަރުގެ ބިމުގެ ދަތިކަމަށް ހައްލެއް ހޯދުމަށްޓަކައި ކުރިއަށްގެންދާ ބިން ހިއްކުމުގެ މަޝްރޫއުގެ ދަށުން، އެ ރަށުގެ ބިން ހިއްކުމުގެ މަސައްކަތް އެއްކޮށް ނިންމާލައިފިއެވެ.
ސަރުކާރުން ކުރިއަށްގެންދާ މި މުހިންމު މަޝްރޫއުގެ ފަހުގެ މައުލޫމާތުތަކަށް ބަލާއިރު، ނައިފަރުން އަލަށް ހިއްކި ސަރަހައްދުގެ ބިން ހިއްކުމުގެ މަސައްކަތް މިހާރު ވަނީ 100 އިންސައްތަ ފުރިހަމަކޮށްފައެވެ. މި މަސައްކަތް ނިމުމާއެކު، ރަށުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ބޮޑު ލުޔެއް ލިބިގެންދާނެ ކަމަށް ބެލެވެއެވެ.
ބިން ހިއްކުމުގެ މަސައްކަތް ނިމިފައިވީ ނަމަވެސް، ހިއްކި ސަރަހައްދު ގިރުމުން ސަލާމަތްކުރުމަށްޓަކައި ކުރިއަށްގެންދާ ގޮނޑުދޮށް ހިމާޔަތްކުރުމުގެ މަސައްކަތް މިހާރު ދަނީ ބާރަށް ކުރިއަށެވެ. އެގޮތުން، މިހާތަނަށް ގޮނޑުދޮށް ހިމާޔަތްކުރުމުގެ މަޝްރޫއުގެ 24 އިންސައްތަ މަސައްކަތް ވަނީ ނިމިފައެވެ.
މިވަގުތު އެ ސަރަހައްދުގައި އެންމެ ހަލުވިކަމާއެކު ކުރިއަށްދަނީ ރިވެޓްމަންޓް ޖެހުމުގެ މަސައްކަތެވެ. މިއީ ހިއްކާފައިވާ ބިން ހިމާޔަތްކޮށް، ގޮނޑުދޮށް ވަރުގަދަކުރުމަށްޓަކައި ކުރެވޭ އެންމެ މުހިންމު އެއް މަސައްކަތެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން އިސްކަންދެއްވައިގެން ކުރިއަށްގެންދާ މި މަޝްރޫއަކީ ނައިފަރުގެ ތަރައްގީއަށް އެޅޭ މުހިންމު ފިޔަވަޅެކެވެ. މި މަޝްރޫއު އެއްކޮށް ނިމުމުން، ރަށުގެ ބިމުގެ ޖާގަ އިތުރުވެ، އިގްތިސާދީ އަދި އިޖުތިމާއީ ގިނަ ފުރުސަތުތަކެއް ހުޅުވިގެންދާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
