ހުރިހާ ކަމެއްގައިވެސް ޤައުމު އިސްކުރުމަށް ރައީސް ޑރ. މުޢިއްޒު ގޮވާލައްވައިފި

ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ސިޔާސަތުތަކާއި ހަރަކާތްތައް އަބަދުވެސް ބިނާވެގެންދާނީ އަމަންއަމާންކަމާއި، ޤައުމީ ތަރައްޤީ އަދި ސަލާމަތާއި ރައްކާތެރިކަމުގެ މައްޗަށް ކަމަށް ވިދާޅުވެ، ހުރިހާ ދިވެހި ރައްޔިތުންވެސް "ޤައުމު އިސްކުރުމުގެ" ވިސްނުން އިސްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

ރައީސް މިކަމަށް ގޮވާލެއްވީ ޕީއެންސީގެ ކޮންގްރެސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، މާޒީގައި ބައެއް ސިޔާސީ ލީޑަރުންނާއި ޕާޓީތަކުން ކަންކަން ކޮށްފައިވާ ގޮތުގެ ސަބަބުން، ޚާއްޞަކޮށް ޒުވާނުންގެ މެދުގައި ސިޔާސީ މަސައްކަތްތަކާމެދު ނޭދެވޭ ތަޞައްވުރެއް އުފެދިފައިވާ ކަމަށެވެ. އަދި މި ވިސްނުން ބަދަލުކުރެވެން އޮތީ "ޤައުމު އިސްކުރުމުގެ" އުޞޫލު ޚިޔާރުކޮށްގެން ކަމަށް އެމަނިކުފާނު ފާހަގަކުރެއްވިއެވެ. އަމިއްލަ މަޞްލަޙަތާއި ޕާޓީގެ މަޞްލަޙަތަށްވުރެ ޤައުމީ މަޞްލަޙަތު އިސްކޮށްފިނަމަ ސިޔާސީ މަސައްކަތަކީ އިޚްލާޞްތެރި އަދި ސާފު ކަމަކަށް ވެގެންދާނެ ކަމަށާއި، އެއްވެސް ސިޔާސީ ލީޑަރަކު ޖަލަށްލައި ސިޔާސީ ބަދަލުހިފުމުގެ ޝިކާރައަކަށް ހަދައިގެން ނުވާނެ ކަމަށް ރައީސް ވިދާޅުވިއެވެ.

މީގެއިތުރުން، ސިޔާސީ ލީޑަރުންނަށް އެއްވެސް ބިރުވެރިކަމެއް ނެތި ސިޔާސީ ހަރަކާތްތައް ހިންގުމުގެ ފުރުޞަތު އޮންނަންޖެހޭނެ ކަމަށާއި، ޤައުމު ކުރިއަށްދާންވާނީ ޤައުމީ އެއްބައިވަންތަކަމާއި ޤައުމީ ލޯތްބާއެކު ކަމަށް ވިދާޅުވިއެވެ. އަދި މި ކޮންގްރެސްއިން އެއްބައިވަންތަކަން ދައްކުވައިދިނުމަށް ޕީއެންސީގެ މެންބަރުންގެ ކިބައިން އެދިވަޑައިގަންނަވަމުން، ކޮންމެ އިންތިޚާބެއްގައިވެސް މޮޅުވާ ބަޔަކާއި ބަލިވާ ބަޔަކު ތިބޭނެ ކަމަށާއި، އިންތިޚާބަށްފަހު ބައިބައިވުމެއް ނެތި އެންމެން އެކުގައި ކުރިއަށްދިއުމަށް ރައީސް އިލްތިމާސްކުރެއްވިއެވެ.

ރައީސް ޑރ. މުޢިއްޒު އިތުރަށް ވިދާޅުވީ، ސަރުކާރުގެ ސިޔާސީ އެޖެންޑާއަކީ ހަމައެކަނި ޤައުމަށް ފައިދާހުރި ނަތީޖާތަކެއް ހޯދައިދިނުމަށް އޮތް ޤައުމީ އެޖެންޑާއެއް ކަމަށެވެ. އަދި ސިޔާސީ ފިކުރު ކޮންމެ ގޮތަކަށް ހުރި ނަމަވެސް، އެންމެންނަކީވެސް އެއް ޤައުމިއްޔަތެއް ހިއްސާކުރާ، އަދި އަންނަން އޮތް ޖީލުތަކުގެ މުސްތަޤްބަލަށް ޒިންމާވާންޖެހޭ ބައެއްކަން ހަނދާން ބެހެއްޓުމަށް ހުރިހާ ރައްޔިތުންނަށް ގޮވާލެއްވިއެވެ. އަދި ކޮންމެ ޕާޓީއަކުން ހުށަހެޅި ނަމަވެސް، ޤައުމަށް ފައިދާހުރި ކަންކަމަށް އެއްބާރުލުން ދިނުމަކީ ޤައުމު އިސްކުރުން ކަމުގައި ފާހަގަކުރެއްވިއެވެ.

ޢުމްރާނީ ތަރައްޤީއާއެކު އިޖުތިމާޢީ ތަރައްޤީގެ މުހިންމުކަމަށް އަލިއަޅުއްވާލައްވަމުން ރައީސް ވިދާޅުވީ، ޢިއްޒަތާއި، ޤައުމީ ފަޚުރާއި، ޤައުމުދެކެ ލޯބިވުމާއި، އިޖުތިމާޢީ އަގުތައް ގެއްލިގެންދާނަމަ، ހަމައެކަނި ބޮޑެތި ޢިމާރާތްތަކާއި ޢުމްރާނީ ވަސީލަތްތަކުން ޤައުމަށް ފައިދާއެއް ނުކުރާނެ ކަމަށެވެ. ދެމެހެއްޓެނިވި އަދި މާނަހުރި ތަރައްޤީއެއް ޙާޞިލުކުރެވޭނީ ޢުމްރާނީ ތަރައްޤީއާއެކު މީހުންގެ ވިސްނުމާއި އަޚްލާޤީ ސިފަތައް ތަރައްޤީކޮށްގެން ކަމަށާއި، ޤައުމުގެ އިޖުތިމާޢީ ފޭރާން ރަނގަޅުކުރުމަކީ ހަމައެކަނި ޕީއެންސީގެ ނޫން، އެންމެންގެ އިޚްލާޞްތެރި މަސައްކަތް ބޭނުންވާ ކަމެއް ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.