ޑިވެލޮޕްމަންޓް ބޭންކުގެ ލައިސަންސް ހޯދުމަށް ހުށަހަޅައިފި
ރާއްޖެއަށް މުޅިން އަލަށް ތައާރަފްކުރަން ނިންމާފައިވާ ޑިވެލޮޕްމެންޓް ބޭންކް ހުޅުވުމަށް ބޭނުންވާ ލައިސަންސް ހޯދުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ހުށަހަޅައިފިއެވެ.
އިކޮނޮމިކް މިނިސްޓަރ މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ޑިވެލޮޕްމެންޓް ބޭންކް އުފެއްދުމަށް ބޭނުންވާ ލައިސަންސް ހޯދުމަށް މިއަދު އެމްއެމްއޭއަށް ހުށަހަޅާފައިވާ ކަމަށެވެ. މި ލައިސަންސް ދޫކުރުމާއި ނުކުރުމުގެ އިޚްތިޔާރު އޮންނަނީ އެމްއެމްއޭއަށެވެ.
ޑިވެލޮޕްމެންޓް ބޭންކު އުފައްދަނީ ސަރުކާރުގެ ސައްތައިން ސައްތަ ހިއްސާ އޮންނަ ކުންފުންޏެއް މެދުވެރިކޮށެވެ. ރައީސް އޮފީހުން ބުނެފައިވާ ގޮތުގައި މި ބޭންކުގެ މައިގަނޑު މަގްސަދަކީ ދެމެހެއްޓެނިވި އިގުތިސާދީ އަދި އިޖުތިމާޢީ ތަރައްގީއަށް އިންވެސްޓުކުރުމާއި، އުމްރާނީ ތަރައްގީއަށް ބޭނުންވާ ފައިސާ ހޯދުމެވެ.
އޭގެއިތުރުން، ޕީއެސްއައިޕީ މަޝްރޫއުތަކަށް ފައިސާ ދިނުމުގައި ދިމާވާ ގޮންޖެހުންތައް ހައްލުކުރުމާއި، ރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރުކުރުން ހިމެނޭ ކަމަށް ވެސް ސަރުކާރުން ހާމަކޮށްފައިވެއެވެ.
ރައީސުލްޖުމްހޫރިއްޔާއަށް ލިބިފައިވާ ބާރުގެ ދަށުން، މި ބޭން އުފެއްދެވުމަށް ނިންމެވީ މިދިޔަ މެއި މަހުގެ 16 ވަނަ ދުވަހުއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
