ވ. އަތޮޅު ހޮހަޅައަށް ގެނބުނު އިޓަލީ ފަތުރުވެރިން ނެގުމުގެ އޮޕަރޭޝަންގައި ބައިވެރިވި ފަރާތްތަކުގެ އަގު ރައީސުލްޖުމްހޫރިއްޔާ ވަޒަންކުރައްވައިފި

ވ. އަތޮޅު އަލިމަތާ ކައިރީގައި އޮންނަ ކަނޑުއަށި ހޮހަޅައަކަށް ފީނަން ގޮސް އުޅެނިކޮށް މަރުވި އިޓަލީގެ ފަސް ފަތުރުވެރިއެއްގެ ހަށިގަނޑު ނެގުމަށް ހިންގި ޚާއްޞަ އޮޕަރޭޝަންގައި ބައިވެރިވި ދިވެހި ސިފައިންނާއި ފުލުހުންގެ އަގު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަސްމީކޮށް ވަޒަންކުރައްވައިފިއެވެ.

މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައި، ރައީސުލްޖުމްހޫރިއްޔާގެ ފަރާތްޕުޅުން މި ޝަރަފު އަރުއްވާފައިވަނީ ހޯމް މިނިސްޓަރު ޢަލީ އިޙްސާން އަދި ޑިފެންސް މިނިސްޓަރު ޣައްސާން މައުމޫންއެވެ. މި ރަސްމިއްޔާތުގައި ކޮމިޝަނަރު އޮފް ޕޮލިސް އަޙްމަދު މުޙައްމަދާއި، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީގެ އިތުރުން ދެ މުއައްސަސާގެ އިސްވެރިންނާއި އޮޕަރޭޝަންގައި ބައިވެރިވި މުވައްޒަފުން ބައިވެރިވިއެވެ.

މި ހާދިސާ ހިނގާފައިވަނީ މިދިޔަ މަހުގެ 14 ވަނަ ދުވަހު ވ. އަތޮޅު ކައިރީގައި ސަފާރީއެއްގައި އުޅުނު އިޓަލީގެ ފަސް ފަތުރުވެރިއަކު ޑައިވިންއަށް ގޮސް އުޅެނިކޮށް ގެއްލުމާ ގުޅިގެންނެވެ. މި އޮޕަރޭޝަން ކުރިއަށްދަނިކޮށް، ފަތުރުވެރިން ހޯދުމުގެ މަސައްކަތުގައި އުޅުނު އެމްއެންޑީއެފް ކޯސްޓްގާޑުގެ ސްޓާފް ސާޖަންޓް މުޙައްމަދު މަހުދީ ވަނީ ނިޔާވެފައެވެ.

މި އޮޕަރޭޝަންގެ ނުރައްކާތެރިކަމަށް ބަލައި، އިޓަލީ ސަރުކާރުގެ އެދުމުގެ މަތިން ފިިންލޭންޑްގެ ތިން މާހިރަކު ވެސް ރާއްޖެ ގެނެސް މި މަސައްކަތުގައި ބައިވެރިކޮށްފައިވެއެވެ. ބައިނަލްއަޤުވާމީ ސަމާލުކަން ލިބުނު މި އޮޕަރޭޝަންގައި، ވ. އަލިމަތާ ހޮހަޅައިގެ ތެރޭގައި ތާށިވެފައި ތިބި ފަސް ފަތުރުވެރިންގެ ހަށިގަނޑު ނެގިފައިވަނީ މެއި މަހުގެ 20 ވަނަ ދުވަހުއެވެ.

މި އޮޕަރޭޝަންގައި ދެއްކެވި ހިތްވަރާއި ހުނަރުގެ އަގުވަޒަންކުރުމުގެ ގޮތުން، އިޓަލީގެ ރައީސް ސާޖިއޯ މަޓަރެއްލާ ވަނީ މި މަސައްކަތުގައި އިސްކޮށް އުޅުނު ފިންލޭންޑްގެ ތިން މާހިރުންނަށް އެޤައުމުގެ އެންމެ މަތީ ޝަރަފު ކަމަށްވާ "އޯޑަރ އޮފް މެރިޓް" އަރުވާފައެވެ. ރައީސުލްޖުމްހޫރިއްޔާ ޑރ. މުޢިއްޒު ވަނީ މި ނުރައްކާތެރި އޮޕަރޭޝަންގައި ދިވެހި ސަލާމަތީ ބާރުތަކުން ދެއްކެވި ސާބިތުކަމަށްޓަކައި ޝުކުރު އަދާކުރައްވާފައެވެ.