އެއްވެސް ބަދަލަކާ ނުލައި ވެޓް މާކެޓް އެއްބަސްވުން ބާޠިލުކުރުމަށް ހައިރު އިންޖިނިއަރިންގ އިން އެދުނު ނަމަވެސް ކައުންސިލުން އެކަން ނުކުރާކަން ހާމަވެއްޖެ

މާލޭގެ މާރުކޭޓުތަކުގެ އިންފްރާސްޓްރަކްޗަރ ޒަމާނީ ފެންވަރަށް ތަރައްޤީކުރުމަށް ހިންގާ "މާލެ ވެޓް މާކެޓް ކޮމްޕްލެކްސް" މަޝްރޫޢަށް ބޭނުންވާ ބިން ހަވާލުކުރުމަށް މާލެ ސިޓީ ކައުންސިލުން އުޒުރުވެރިވަމުންދާކަން ހާމަވެއްޖެއެވެ.

މި މަޝްރޫޢަކީ ކޮންޓްރެކްޓަރ ފައިނޭންސް އުސޫލުން 15 މާރިޗު 2026 ގައި ޓްރަސްޓެންޑް މޯލްޑިވްސް ޕްރައިވެޓް ލިމިޓެޑާ ހަވާލުކޮށްފައިވާ މަޝްރޫޢެކެވެ.

ސަރުކާރުން ހާމަކުރި ގޮތުގައި، މި މަޝްރޫޢަށް ބޭނުންވާ ބިން ހަވާލުކޮށްދިނުމަށް އެދި ތަކުރާރުކޮށް ސިޓީ ފޮނުވުމުންވެސް، ކައުންސިލުން ބުނަމުންދަނީ އެ ބިން ހަވާލުކުރެވެން ނެތް ކަމަށެވެ. ކައުންސިލުން ސަބަބެއްގެ ގޮތުގައި ދައްކަނީ 2023 ވަނަ އަހަރު ހައިރު އިންޖިނިއަރިންގ ކޮންސަލްޓަންސީއާއެކު ވެފައިވާ އެއްބަސްވުމެކެވެ. ނަމަވެސް، އެއްވެސް ބަދަލަކާ ނުލައި އެ އެއްބަސްވުން ބާޠިލުކުރުމަށް ހައިރު އިންޖިނިއަރިންގ އިން ކައުންސިލަށް ސިޓީ ފޮނުވާފައިވީ ނަމަވެސް، މިއަދާ ހަމައަށްވެސް އެ އެއްބަސްވުން އުވާލުމުގެ މަސައްކަތް ކައުންސިލުން ކޮށްފައެއް ނުވެއެވެ.

މި މަޝްރޫޢުގެ ދަށުން މާލޭ މަސްމާރުކޭޓާ ކުރިމަތިވާގޮތަށް އޮތް ފަޅުތެރެއިން ހިއްކާފައިވާ ސަރަހައްދުގައި ބޭސްމަންޓަކާއެކު 5 ފަންގިފިލާގެ އިމާރާތެއް ބިނާކުރުމަށް ވަނީ ހަމަޖެހިފައެވެ. މި މަޝްރޫޢު ކުރިއަށް ގެންދަނީ މާލޭ ސިޓީ ކައުންސިލުން ޕްލޭންކޮށް ޑިޒައިންކޮށްފައިވާ ގޮތަށް ކަމަށްވާއިރު، ހައިރު އިންޖިނިއަރިންގ އިން ވަގުތީ ގޮޅިތަކެއް ހެދުން ފިޔަވައި އެއްވެސް އަމަލީ މަސައްކަތެއް ކޮށްފައި ނުވާތީ، އެއްބަސްވުން ބާޠިލުކުރުމަށް އެއްވެސް ހުރަހެއް އޮތް ކަމަށް ސަރުކާރުން ނުދެކެއެވެ.

ލާމަރުކަޒީ ޤާނޫނުގެ 56-2 ވަނަ މާއްދާގެ ދަށުން، ދައުލަތުގެ ބޭނުމަށް ނުވަތަ ޤައުމީ ތަރައްޤީގެ މަޝްރޫޢަކަށް ބޭނުންވާ ބިން ނެގުމުގެ އިޚްތިޔާރު ދައުލަތަށް ލިބިގެންވެއެވެ. ނަމަވެސް ކައުންސިލުން މިކަމަށް އިޖާބަ ނުދީ އޮތުމަކީ "އާންމު ރައްޔިތުންގެ ލާބައާއި މަންފާއަށްވުރެ ބޮޑަށް ސިޔާސީ މަޞްލަޙަތު އިސްކޮށްގެން ކުރަމުންދާ ކަމެއް" ކަމަށް ސަރުކާރުން ތުހުމަތުކުރެއެވެ.

600 ދުވަހުގެ ތެރޭގައި ނިންމުމަށް ކަނޑައަޅާފައިވާ މި މަޝްރޫޢުގެ ފައިނޭންސް ހަމަޖެހި، ކޮންޓްރެކްޓަރު މަސައްކަތަށް ތައްޔާރުވެފައިވީ ނަމަވެސް، މަސައްކަތް ނުފެށި އޮތް ހަމައެކަނި ސަބަބަކީ ބިން ހަވާލުނުކުރުމެވެ. މިކަމުގެ ސަބަބުން މަޝްރޫޢުގެ އަގު ބޮޑުވެ، ރައްޔިތުންނަށް ލިބެންޖެހޭ ޚިދުމަތްތައް ލަސްވަމުންދާކަން ސަރުކާރުން ވަނީ ފާހަގަކޮށްފައެވެ.