އއ. ފެރިދޫ ކައުންސިލާ ވަޒީރު އާދަމް ޝަރީފު ޢުމަރު ބައްދަލުކުރައްވައިފި

އއ. ފެރިދޫ ކައުންސިލާ ވަޒީރު އާދަމް ޝަރީފު ޢުމަރު ބައްދަލުކުރައްވައިފިއެވެ. އިއްޔެ މި ވުޒާރާގައި އޮތް މި ބައްދަލުވުމުގައި އެ ކައުންސިލުގެ ބައެއް ކަންބޮޑުވުންތައް ވަޒީރާ އަޑުއެއްސެވިއެވެ.

މި ބައްދަލުވުމުގައި އެ ރަށުގައި ޕޮލިސް ސްޓޭޝަނެއް ޤާއިމުކުރުމަށް ބޭނުންވާ ޢިމާރާތެއް މިހާރު ރައްޔިތުން ހަމަޖައްސައިދީފައިވާ ކަމަށާ، އެހެން ކަމުން ޕޮލިހުންގެ ޚިދުމަތް އެ ރަށުގައި ފެށޭނެ ގޮތް ހައްދަވައިދިނުމަށް ވަޒީރުގެ އަރިހުން އެދިވަޑައިގެންނެވިއެވެ.

މި ބައްދަލުވުމުގައި އެ ކައުންސިލުގެ މެންބަރުން ދެއްކެވި ވާހަކާގައި އެ ރަށަކީ ރާއްޖޭގައި އެންމެ ކުޑަ ބަޖެޓް ލިބޭ 12 ރަށުގެ ތެރޭގައި ހިމެނޭ ރަށަކަށް ވާތީ ރަށުގެ ބިމުން ނަފާ ލިބޭނެ ގޮތްތައް ކައުންސިލަށް ފަހިވުމުގެ ބޭނުންތެރިކަމާ މެދު މަޝްވަރާކުރެވުނެވެ.

އެ ގޮތުން، އެ ރަށުގައި ޓުއަރިޒަމް ޒޯނެއް ކަނޑައެޅުމަށް ކުރައްވަމުން އަންނަ މަސައްކަތް ކާމިޔާބުކޮށް ދެއްވުމުގައި ވަޒީރުގެ އެހީތެރިކަމަށް އެދިވަޑައިގެންނެވިއެވެ.

އިއްޔެގެ މި ބައްދަލުވުމުގައި ފެރިދޫ ހިމެނޭ ކުލަސްޓަރގެ ވެރިން ބައިވެރިވެލެއްވިއެވެ.