އިސްލާމީ ކަންތައްތަކާ ބެހޭ ވުޒާރާގެ އީ-ލައިބްރަރީއަށް ފޮތް ހަދިޔާކުރާން އެދިއްޖެ
އިސްލާމީ ކަންތައްތަކާބެހޭ ވުޒާރާގެ ވެބްސައިޓުގައި ހިމެނޭ އޮންލައިން-ބުކް ލައިބްރަރީއަށް ފޮތް ހަދިޔާކުރާން ލިޔުންތެރީންނާއި ޢިލްމުވެރީންގެ ކިބައިން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު އެދިވަޑައިގެންފިއެވެ.
މިދިޔަ ހުކުރު ދުވަހު ލޯންޗުކުރި އިސްލާމީ ކަންތައްތަކާ ބެހޭ ވުޒާރާގެ އައު ވެބްސައިޓުގައި އޮންލައިން ލައިބްރަރީއެއް ހިމެނެއެވެ. މި ލައިބްރަރީގައި 2008ވަނަ އަހަރުން ފެށިގެން އެ ވުޒާރާއިން ނެރެފައިވާ ފޮތްތައް އޮންލައިނުކޮށް ކިޔައިލެވޭނެ އިންތިޒާމް ވަނީ ހަމަޖެހިފައެވެ.
އެކްސްގައި ކުރެއްވި ޕޯސްޓެއްގައި ވަޒީރު ޑރ. ޝަހީމް ވިދާޅުވީ އަމާޒަކީ އިސްލާމީ އަދި ތަފާތު ދާއިރާތަކުން ވީހާވެސް ގިނަ އަދަދެއްގެ ފޮތްތައް، ވުޒާރާގެ އީ-ލައިބްރަރީން ކިޔޭނެ ގޮތް ހެދުން ކަމަށެވެ. އަދި ހުރިހާ ޢިލްމުވެރިންނާއި ލިޔުންތެރިން، އީ-ލައިބްރަރީއަށް ފޮތް ހަދިޔާކުރެއްވުމަށް ޕޯސްޓުގައި ވަޒީރު ވަނީ އެދިވަޑައިގެންފައެވެ.
ވުޒާރާގެ އޮންލައިން އީ ލައިބްރަރީއަށް ފޮތް ހަދިޔާ ކުރައްވަން ބޭނުންވާ ފަރާތްތަކަށް ވުޒާރާއަށް ގުޅައިގެން އޮންލައިން ލައިބްރަރީއަށް ފޮތް ހަދިޔާކުރެވޭނެއެވެ.
އިސްލާމީ ކަންތައްތަކާ ބެހޭ ވުޒާރާގެ އޮންލައިން ލައިބްރަރީގައި މަޝްހޫރު ދީނީ ފޮތްތައްކަމަށްވާ ރިޔާޟުއްޞާލިޙީން އަދި ފިޤުހުއްސުންނާ ފަދަ ފޮތްތަކުގެ ދިވެހި ތަރުޖަމާ ހިމެނެއެވެ. މީގެ އިތުރުން އިސްލާމީ ޢަޤީދާއާއި، ފިޤުހާއި، ކީރިތި ރަސޫލާގެ ސުންނަތާއި، ހިދާޔަތުގެ އަލި މަޖައްލާ ފަދަ ފޮތްތަކާއި މަޖައްލާތައް މި ލައިބްރަރީގައި އޮންލައިންކޮށް ކިޔޭން ހުރެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
